Publicado en Cuerpu Humanu, Curiosidaes

Prótesis en 3D pa la mano de Marta

Estudiantes y profesores del Medialab unvien kits p’ayudar a persones con necesidaes en Camboya

Un grupu d’estudiantes de la Universidá d’Uviéu desendolca una prótesis en 3D pa un ñácaru de Xixón de dos años. Marta Rodríguez nació de manera prematura con siete meses, una hermana ximielga y una única mano. El proyectu ‘Superhéroes’ de la Cátedra MediaLab ta imprimiendo dellos ‘gadgets’ o dispositivos p’ayudala a ser independiente nes sos actividaes de caldía.

Marta y Ana son idéntiques menos por una mano izquierda. Lo que les fizo diferentes foi una falta de riegu sanguineu nel desendolcu prenatal. Llegaron por sorpresa: dos meses enantes de lo previsto y ensin diagnósticu enantes.

La madre de les neñes, Adriana Arroyo, esplica que dempués del disgustu inicial «entamamos a buscar tolo que se podía facer p’ayudar a Marta porque nun sabíemos que diba a desenvolvese como se desenvuelve».

La pequeña ta deprendiendo a agarrase a la bici, al manillar de la moto y munches coses más. El primer ‘gadget’ que ficieron foi pa garrar una cuyar porque enagora manéxase cola derecha, pero necesitarálo cuando tenga que partir una tayada de pitu, por exemplu.

El prototipu ye un guante de plásticu duro nel que puen inxerise dellos dispositivos. Un pequeñu garfiu pa vistise, p’aguantar el cepiyu dientes o pa xugar con pelotes. La prótesis final sedrá una impresión en 3D con un material flexible y hipoalerxénico, asemeyao a la goma eva. El procesu dura unos seis meses.

Saray Gancedo, coordinadora de ‘Superhéroes’, esplica que «teníemos prótesis pensaes que yeran perllargues y nel casu de Marta, la distancia qu’había que compensar yera mui curtia y nun tábamos acostumaos».

Diseñen a demanda y ufierten prótesis personalizaes p’actividaes específiques. Trabayen con otres nueve families y intenten ayudar en Camboya, unviando kits pa que persones con necesidaes puean unvia-yos moldes de yesu colos qu’entamar a trabayar.

El proyectu ‘Superhéroes’ de la Cátedra MediaLab son 11 estudiantes y profesores voluntarios. Dende inxenieros hasta terapeutes ocupacionales.

  • Cátedra MediaLab Edificiu Polivalente. Campus de Xixón Cai/ Luis Ortiz Berrocal s/n. Planta 3. Xixón 33203 – Asturies
  • Email: medialab@uniovi.es
  • Teléfono: +34 (0) 985 182 490

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *