Alborecemos col cielu poco noboso y dellos borrinos y nublines no fonderu los valles con unes temperatures que tan alrodiu de los 10ºC.
Güei llunes la nubosidá dira n’aumentu emburriada pol vientu nordés que mos dexará’l cielu nuble a partir del mediudía, dexándonos precipitaciones a primera hora de la tarde na fastera centru-oriental d’Asturies onde puen tener calter moderáu, na ocidental sedrán mui poco probables. Les temperatures camudarán poco, calteniéndose un ambiente fresco.
Mañana martes seguiremos con esti fluxo de vientu nordés que mos apurrirá nubosidá abondosa y delles precipitaciones febles en xeneral con unes temperatures másimes en descensu, mentantu les mínimes ascenderán por mor del cielu cubiertu.
El miércoles paez que puen abrise dellos claros , asina y too pue cayer dalguna gotera y nel cielu predominarán les nubes con vientu nordés que pue ser dalgo cafiante na costa.
El xueves sedrá’l meyor día de la selmana, dirá disminuyendo la nubosidá pa quedar poco nuboso, tendremos un ascensu de les temperatures másimes y ausencia de precipitaciones, sicasí l’aire nordés pue ser molestu nel llitoral, baxando dalgo la sensación térmica.
El vienres dirá n’aumentu entovía más l’aire nordés, apurriéndonos nubosidá de retención na contorna de los cordales asturianos cola posibilidá de que mos dexe dalguna precipitación con un descensu de les temperatures.
Anque tovía hai munches duldes la fin de selmana paez que pue ser dalgo inestable con delles nubes y precipitaciones ocasinales ya disperses pero esto yá lu diremos viendo.
