Publicado en Concursu, Fotografía

Semeya: «Más qu’alimentu»

Más qu’alimentu: la semeya ganadora del concursu Pink Lady® Food Photographer of the Year fálanos del venceyu y l’inspiración del ritual de la cocina.

La comida ye muncho más que comida. Ye cultura, ye tradición, ye innovación, ye conexón, ye venceyu y ye hestoria. Retratala ye entestar tou eso n’una imaxe, d’ende’l creciente prestíu del certame de fotografía gastronómica Pink Lady® Food Photographer of the Year, que’l martes 27 d’abril, n’una ceremonia retresmitida al traviés de YouTube, anunció los ganadores de la so edición de 2021.

Nel últimu añu, quiciabes más que nunca, la comida convertiose n’unu de les exes de la nuesa rutina. Nun valor seguru cuando nada lo yera, n’una certidume cuando la incertidume yera una constante. La comida foi un pasatiempu; la cocina, un escenariu para espresar la nuesa creatividá; la mesa, un puntu d’alcuentru y un abelugu.

El significáu universal d’una comida y la so preparación

La manida coletilla “como nun podía ser d’otra manera” toma, nel resolvimientu d´esti concursu, un carís distintu. De xacíu que la fotografía ganadora del certame (qu’encabeza esti artículu) tenía qu’amosar lo que la comida, la so preparación y la mesa significaron para toos, como sociedá, nos últimos meses.

Por eso, nun sospriende la imaxe que’l xuráu, que cunta ente los sos miembros col chef Simone Zanoni, del restorán -y George, nel Four Seasons de París, o col prestixosu fotógrafu gastronómicu David Loftus, escoyó como vencedora na categoría absoluta.

Trátase de Taste, xuna instantánea que foi tomada pol fotógrafu chinu Li Huaifeng en Licheng, Shanxi, nun día templao y soleyero. Amuesa a una familia nueva compartiendo l’allegría cotidiano de preparar la comida y, según el panel d’espertos, ye “xuna imaxe tienra y sutilmente poderosa pa los nuesos tiempos”.

“Esta imaxe ye técnicamente sobresaliente nel usu de la lluz y la composición, pero lo que la alza al nivel d’importancia histórica ye la fondura de la so narración y emoción. Fala d’un añu d’aislamientu y vida n’interiores, viviendo en pequenes comunidaes familiares”, sostien Caroline Kenyon, directora y fundadora d’esti premiu.

“Equí, la escena ta bañada d’amor, con ecos de la Madonna y el neñu. Xuna toma escepcional que demuestra perfectamente que la fotografía nun precisa impactar nin alteriar pa ser grandiosa o memorable. Esta imaxe esquisita permanez na mente”, amiesta.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *