Publicado en Día de...

Día del Trabayu

El Día Internacional de los Trabayadores o tamién conocíu como’l Día del Trabayu celebra’l primeru de mayu, para conmemorar a nivel mundial al movimientu obreru y la fuerza llaboral, como movimientu reivindicativu de distintes causes rellacionaes col trabayu. Apocayá más de cien años, les fábriques yeren centros de trabayu nos cualos trabayaben por igual homes, muyeres, vieyos y neños, con xornaes de más de 12 hores diaries. Esta cansosa xornada llaboral nun daba opción a les persones de recuperase, folgar nin esfrutar de tiempu d’ociu.

Enforma tuvieron que lluchar los trabayadores mientres años para consiguir establecer la xornada llaboral d’ocho hores, inclusive a cuenta de les sos propies vides. Anguaño, el Día de los Trabayadores convirtióse n’una efeméride festiva, pero nun hai qu’escaecer qu’esta fecha rinde homenaxe a aquellos que llucharon por una vida digna para toos los trabayadores y les trabayadores.

Los oríxenes d´esti día remontense al añu 1886, n’Estaos Xuníos. Nesa dómina los trabayadores empecipiaron una llucha para amenorgar la xornada llaboral a 8 hores. La única llende qu’esistía yera’l nun faer trabayar a una persona más de 18 hores ensin causa xustificada y la consecuencia yera una multa de 25 dólares.

Na llucha poles sos reivindicaciones llaborales, llograron derechos y beneficios contractuales que fueron reconocíos pola llexislación en materia llaboral, contemplaos en contratos y convenios colectivos de trabayu. De siguío mentamos dalgunos d’ellos:

Amenorgamientu de la xornada llaboral a 8 hores.
Seguridá Social: Seguro contra Enfermedaes, Accidentes de Trabayu, Invalidez y Vieyera.
Igualdá salarial.
Derechu al salariu mínimu.
Esfrute de vacaciones.
Bonificaciones.
Pagu de díes festivos.
Derechu a l’Asociación Sindical.
Derechu a la fuelga.

Organización Internacional del Trabayu (OIT) ye una axencia tripartita de la Organización de les Naciones Xuníes (ONU), qu’axunta a gobiernos, empleadores y trabayadores de 187 estaos miembros. Foi creada nel añu 1919, como parte del Tratáu de Versalles que terminó cola Primer Guerra Mundial, reflexando’l convencimientu de que la xusticia social ye esencial para algamar una paz universal y permanente.

Ente los principales oxetivos d’esti organismu destáquense la promoción de los derechos llaborales, fomentar oportunidaes de trabayu, formular polítiques y ellaborar programes que promuevan el trabayu decente d’homes y muyeres. Coles mesmes, aguiyar el meyoramientu de la protección social de los trabayadores y fortalecer el diálogu, nel abordaxe de temes rellacionaes col trabayu.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *