Sueñu/Suañu
Na mio llingua
estremamos
el sueñu del suañu.
El primeru átanos al suelu,
ponnos piedres nos bolsos
pa que nun nos mueyen
les nubes cargaes.
El segundu llévanos a
trescombar
los cumales inalcanzables
con reblagos alegres.
Hai un momento,
cuando’l día, mansu, declina,
en que’l suañu garra
de la mano
al sueñu
y nesi eclipse d’estraña
guapura crepuscular
despunta un arrebatu de llucidez
y pasamos a dormir
y trancamos la puerta
y trancamos les puertes.
📌Poema que nos fala de la diferencia ente tener suañu y tener suaños. Porque n’asturianu estremamos sueñu de suañu… el suañu llévanos a algamar lo que propongamos… (O siquier a intentalo). Y si tienes sueñu, duerme. Pero nun escaezas, cuando espiertes, siguir lluchando por ese suañu que tienes.
