Publicado en Artículos, Tradiciones

La Guirria falta a la so cita per primer vegada n’ocho décades

Les restricciones pol covid torgaron a Ponga cumplir anguaño con una tradición celebrada de manera ininterrumpida dende los años cuarenta del sieglu pasáu. Artículo orixinal LNE.

Cuando el Guirria asítiase la mázcara la maxa vuelve a Ponga. Asocede cada 1 de xineru dende “tiempos ancestrales” y anque naide sabe datar el so orixe, toos s´empeñen en caltener la so esencia. Ayeri foi la primer vegada, dende la Guerra Civil española que tan emblemática figura nun partió besos a les moces solteres nuna carrera pola cais del pueblu nin tampoco espardió ceniza a los homes que s’interponen por que nun se cole nes cases de San Juan de Beleñu.

La pandemia nun dexó qu’anguaño na capital pongueta, nin tampoco en Sobrefoz –onde mozos moces salen tamién a caballu-, celebrárense los aguilandos. Ayeri nun había comida a esgaya nes cases pa recibir a la mocedá, nin tampoco dineru nin dulces pa los solteros que van pidiendo poles viviendes pa depués convidar a les solteres. Los mozos nun desfilaron en caballu, nin los pequeños en burru/pollín. Nin se enarbolaron cantares propios de quien, por costume, supieron caltener la que güei ye la fiesta más antigua d’Asturies.

La Guirria, 2020. | R. E. S. R.

Seique’l tiempu borrara la so utilidá inicial, pero’l so calquier permanez intacta. La Guirria, qu’escuende la so identidá so una mázcara blanca y una barba negra, nació “quién sabe cuándo, falen de la dómina prerromana”, pa favorecer la unión ente los solteros. Esa, siquier, ye una de les lleendes qu’arrodien al personaxe que visti a rayes, lleva un gran caperuzo y salta sobre una vara llarga.

En Ponga nun pasa’l tiempu si de recordar esi día trátase, y anque la forma de cortexu evolucionó, los vecinos nun quieren que “la fiesta más particular y única que tien Asturies” termine.

“Lo guapo”, cunta l’alcaldesa, Marta Alonso, “ye ver cómo la ilusión foise arimando” de xeneración en xeneración. Cómo los pequeños van aprendiendo los cantares del grupu d’aguilanderos. Cómo los sos padres acompáñenlos, remembrando los sos años mozos. Y cómo arrienden, allá onde faiga falta, los pequeños burros por que, dende la más tienra infancia, los mozos apriendan a ser parte d’una comitiva ancestral. “Ye un tradición bien enraigonada” que naide quier que suma. Por tou lo que representa culturalmente y por tou lo qu’apurre a la economía de la zona.

Porque l’Aguilandu de Beleñu convirtióse nun reclamu turísticu de primer nivel nel conceyu. “L’añu pasáu podría haber perfectamente unes 4.000 persones en Beleñu qu’allegaron namá a ver l’Aguilandu y a la Guirria”, recuerda la rexidora.

Por eso anguaño yá s’empecipiaren los trámites por que, en coordinación cola Delegación de Gobiernu, estableciérase un sistema d’autobuses lanzadera y evitar la llegada de los coches a la capital. Los chigres, les cases rurales, los hoteles cercanos echen de menos nesta ocasión al personaxe mitolóxicu y a tolos curiosos que quieren averase a conocelo.

Símbolu de llibertá

Cunten que la Guirria ye un bruxu, un diañu. Pero tamién falen d’él como’l representante de la llibertá del Añu Nuevu, lo que precisamente simboliza cuando sale corriendo dende la parte alta de Beleñu pa nun parar nunca de brincar y correr mientres se cola per puertes y ventanes nes cases de los vecinos. Dicen que ye un ser invulnerable y allegre encarnáu por quien ye escoyíu nun alcuentru secretu nel día más vieyu del añu, antes de la medianueche. Ende, los mayores de 15 años tomen parte nun sortéu pa empareyar coles solteres. D’ente ellos, escoyen al singular personaxe que’l so orixe pérdese na nueche de los tiempos.

Y tou asocede namá en Ponga. La Guirria, la so identidá, el personaxe, “nunca salió d’equí”, sorraya Alonso. Porque magar les propuestes, los ponguetos son fieles a les sos tradiciones. Adulces consiguieron faer del so día 1 de xineru una fiesta d’Interés Turísticu Rexonal y el Conceyu trabaya agora por que sía reconocida a nivel nacional. Y deben de dir nel bon camín cuando anguaño la Tesorería de la Seguridá Social escoyó una imaxe de la Guirria y cuntó parte de la so hestoria pa felicitar les fiestes navidiegues de manera oficial.

 

Autor:

Maestra de Llingua Asturiana Colexu Carmen Ruiz-Tilve - Uviéu