Publicado en Alimentos

L’abellugu porcín de Siero

Monte Cabriles, l’abellugu porcín de Siero

Cuatrocientos exemplares del “gochu del monte” críen en Siero /Inés Gago Sixto Cortina (Traducción)

Monte Cabriles, el refugio porcino que acaba de ser reconocido con un sello de calidad

A les ocho de la mañana, pel iviernu y con nieve na carretera, a naide-y resulta prestoso xubir andando dos kilómetros al Monte Cabriles a alimentar a los gochos. Eso sábelo de primera mano José Manuel Suárez, responsable de la ganadería porcina de Crivencar-Tierra Astur, porque lo lleva faciendo ocho años, desque entamaron’l proyectu. Pero, si fai un balance de tou ello y quita los díes más fríos del iviernu y esos que “hai que mudar tres vegaes la ropa y l’agua pinga hasta los güesos”, el trabayu merez la pena porque él nun taba fechu “pa tar sentáu nun ordenador y metíu tol día nuna oficina” sinón pa “la vida plena na naturaleza”. Y depués, claro, ta la calidá del productu.

Amás, trabayar con animales criaos en llibertá, “que nun son una bicicleta; hai que venir mirar tolos díes”, tamién xenera muncha satisfaición. Por casu, nesos duros y fríos díes d’iviernu, los “gochinos” cuerren pela nieve, como si tuvieren xugando, pa recibir la so dosis diaria de piensu. Un poco de compensación.

“Tou lo que-yos damos ye ecolóxico. Peles mañanes, quedamos n’Uviéu pa dir buscalo, y a les ocho, de normal, empezamos el trabayu. Vamos peles distintes árees dándo-yos de comer y contabilizando que tean tolos animales”, cuenta José Manuel Suárez. Ye un home sele, que vive en Faro, en Llimanes, y lleva tola vida criando ganáu. Anque gochos, dende va solo ocho años.

Foi de la siguiente forma: primero, estudiaron la zona y fixeron les corralaes. El terrén son 50 hectárees y pertenez al Conceyu, pero anguaño tienen robláu un conveniu que-yos permite la so esplotación.

Aitor Quinta acallentando a una madre
mientres les sos críes esperen a que les alimenten. | M. L.

Amás de les corralaes, llantaron dellos árboles por que tuvieren lo más a gusto posible, numberaron les parceles y asitiaron la llendadora llétrica, a la que los animales “respeten abondo”.

En cada zona viven una etapa de la so vida de gochos. Al entrar al área del Monte Cabriles, na parte inferior, ta’l machu duroc con delles femes d’asturcelta, onde se va a producir el cruce. Non mui llueñe d’elles, tán les yá preñaes –la xestación dura tres meses, tres selmanes y tres díes– nuna zona más amplia “por que tean tranquiles”. Tamién dixebren a aquelles qu’acaben de parir. Por casu, esti día había una qu’acababa de tener catorce críes nuna cortil separada del restu. Los llechonos pasen cola madre un total de sesenta díes porque asina previenen enfermedaes.

Tamién, non mui llueñe de les qu’acababen de ser madres, tán los gochos recién “tresllechaos” y que llueu van pasar a la parte de cebu, na parte cimera. “Cuando nacen, cuéyente nuna mano, y en quince díes el so tamañu dóblase. Esto ye porque’l periodu de xestación ye percurtiu”, esplica’l responsable de la ganadería porcina. Nun-y falta razón: la diferencia ente los naciellos, na parte inferior, y los que llueu van pasar al mataderu ye abismal; más de diez vegaes el so pesu y tamañu. Juan Carlos Martínez, responsable de comunicación de Crivencar, esplica’l trance final del ganáu de xeitu singular: “Críense felices. Préstanos dicir que lo que tienen ye un día malu”.

Mientres fala, Aitor Quinta entra y sal de les finques partiendo piensu a los gochos, que se ponen nerviosos –inclusive un poco ansiosos– ente la espectación de la so hora de comida. “Pos damos-yos tolos díes”, bromia Suárez. Toos y caún del añu, per selmana o fin de selmana; llueva, nieve o truene. Dedicación. Ye’l trucu pa tener sobre la mesa “carne calidable”.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *