La Conseyería de Cultura, Política Llingüística y Turismu presentó Asturies, camín al andar, una páxina web destinada a convertise na guía de referencia sobre tolos aspectos que faen referencia a los trés Caminos de Santiago asturianos y a la so contornada cultural y patrimonial. Asturies, camín al andar (https://www.asturiescaminalandar.es/) ufierta los sos conteníos n’español, asturianu y inglés.
El director xeneral de Cultura y Patrimoniu, Pabló León, esplicó los detalles de la publicación dixital na presentación, que se fixo nel pabellón del Gobiernu del Principáu na Feria Internacional de Muestres d’Asturies (FIDMA), qu’acueye la esposición del mesmu nome y que ta dedicada tamién a les trés rutes xacobees d’Asturies.
El director xeneral de Cultura y Patrimoniu señaló’l calter eminentemente prácticu d’una publicación qu’axunta la exhaustividá y el rigor de la so información sobre les rutes asturianes con una partida de servicios complementarios que convierten el trabayu nuna gran guía pa quien quieran conocer una parte esencial del patrimoniu cultural asturianu y quien nagüen por percorrela y visitar la so redolada.
León destacó dos cualidaes singulares d’Asturies, camín al andar. De primeres, el fechu de que se trata d’una páxina susceptible de tar abierta a una actualización de contino y que tien la cualidá de poder incorporar conteníos nuevos, o variar los existentes cuando seya menester. Per otra parte, la web quier ser una ferramienta accesible y válida tanto pa pelegrinos esperimentaos como pa visitantes esporádicos o pa llectores interesaos.
Con una estructura cenciella que fai posible un accesu fácil a los conteníos, la páxina dixital ufierta un viaxe pelos caminos Primitivu, del Salvador y de la Costa en 27 etapes y con más de 300 fiches d’información de les localidaes, los monumentos y el patrimoniu cultural que s’atopen na contornada de les trés rutes. A partir d’una descripción, cuasimente realizada pasu a pasu, l’usuariu pue tener una información precisa sobre les localidaes peles que pasa y sobre los elementos patrimoniales y culturales de la so redolada.
Asturies, camín al andar propón 9 etapes pa facer el Camín Primitivu, dende Uviéu al altu d’El Garabocho (Grandas de Salime); 3 pal Camín del Salvador, dende Payares a Uviéu; y 15 pal Camín de la Costa, ente Bustio y Santiago d’Abres.
Información práctica
La páxina complementa la propuesta de les trés rutes con una información práctica qu’incluye l’Axenda Cultural del Principáu d’Asturies, onde pue consultase la programación cultural más destacada y les actividaes del Xacobéu. Amás, la web pon a disposición del usuariu los datos y los contactos de los albergues de pelegrinos qu’hai a lo llargo de les trés rutes, y los de les asociaciones asturianes del Camín de Santiago.
Amás, la publicación contién dellos enllaces d’interés prácticu, como los de la información meteorolóxica o la de calter sanitariu, que dexa consultar les midíes aconseyaes pa facer el Camín de la manera más segura. Ufierta tamién conseyos pa encarar el pelegrinaxe de la manera más afayadiza y l’accesu a contactos de posible utilidá, como’l de Correos o los de les embaxaes y consulaos. Otru de los apartaos interesantes sobre manera ye’l llamáu Reportaxes, integráu por una selección de testos sobre’l Camín de Santiago publicaos nel blog oficial de Turismu Asturies.
