Tres dellos aproximamientos iniciales, Talgo yá tien definíu cómo va ser el diseñu interior de los trenes de bien alta velocidá Avril. Sía que non, el tren Avril -capaz d’algamar los 360 per hora, anque pel momento va tar llindáu a 300 y la so llende comercial asitiase en 330- revoluciona en munchos aspeutos la movilidá ferroviaria, pos ye más llixeru y eficiente nel consumu d’enerxía eléctrica que los sos predecesores.
Nel so diseñu interior llama l’atención la disposición de los asientos -los coches pueden reconfigurase el so moblame para distintes necesidaes-, más asemeyada a la d’un avión qu’a los trenes convencionales. Asina, los asientos disponense en grupos de dos y trés, pos los técnicos de Talgo llograron aprovechar al máximu’l gálibu del anchor de la caxa y amenorgaron el pasiellu central en clase turista. Por tanto, pueden tresportar a más viaxeros con menor costu enerxéticu, el suañu de cualquier operadora ferroviaria para optimizar los costos fixos d’esplotación.
Asina son capaces de llevar un máximu de 581 pasaxeros, casi 200 más qu’un tren d’alta velocidá convencional. En clase preferente, los asientos, dalgunos d’ellos orientables al sentíu de la marcha, diríen en secuencies de 2+2, con más espaciu per tantu para los viaxeros. L’aumentu d’anchor compensase con coches más curtios que dexen una meyor adaptación y estabilidá en trazaos más tropezosos qu’una llínea d’alta velocidá al usu.
El tren ta pensáu para ufiertar la máxima accesibilidá para persones con movilidá amenorgada, al tener les puertes al mesmu altor que l’andén. Tamién cunta con zones reservaes a sielles de minusválidos, como puede apreciase nes fotografíes proporcionaes por Talgo. El fácil accesu dexa amás que’l tren enllenese con rapidez nes hores punta.
Nel coche cafetería optóse por un modelu d’autoserviciu ensin barra, que da más amplitú al espaciu. Cada coche va tener un aséu, a esceición del de la cafetería, unos servicios muncho más amplios que los habituales en trenes convencionales. Tamién se previeron contenedores más seguros para equipaxes, qu’eviten el peligrosu movimientu de les maletes en casu d’una frenada d’urxencia.
Tolos asientos cunten con pantalles d’entretenimientu similares a les de los aviones, anque paez que nun va ser asina nes configuraciones de máxima ocupación para les unidaes que se destinen a los viaxes de baxu costu cola marca Avlo, una opción bastante probable por que Renfe pueda competir colos trenes de dos pisos de la francesa Ouigo, fabricaos por Alstom. Los asientos cunten con una amplia mesa plegable, pero tamién hai módulos con mesa compartida para families o grupos d’empresa.
