- Entrevista en MusicaAsturiana /
- Noticia Asturies.com /
«”Dixo miou padre” fala d’aprender, d’aceptar ya de buscar cada unu’l so camín»
Un tema escritu na variante occidental del idioma, ‘Dixo miou padre’, resultó ganador del XV Premiu Camaretá al Meyor Cantar. Vero Rubio, de Cangas del Narcea, ye l’autora d’esta pieza que convenció al xuráu presente na gala celebrada nel xixonés Teatru de la Llaboral.
Sentada al tecláu y acompañada por un tríu de cuerda y dos voces presentó n’escena Rubio’l so ‘Dixo miou padre’, abriendo una gala emitida nesta ocasión en diferío per TPA a la que tamién ganara accesu Marisa Valle Roso, con ‘Tonada’; Alienda, con ‘Zanca de cabra’, tamién n’occidental; y José Manuel Tejedor, con ‘Les tos nales’. Tamén xubiera al escenariu’l domingu Algaire, nesti casu como ganador del añu pasáu col so ‘Coral y maera’, mientres el xuráu tomaba la difícil decisión dau l’altu nivel de toles actuaciones y propuestes.
El cantar sele de Rubio sería finalmente’l ganador del XV Premiu Camaretá al Meyor Cantar, con una recompensa de 6.000, la realización d’un videoclip y la incorporación de l’artista al ciclu ‘Autores en camín’. Un debú esitosu en solitariu d’esta música esperimentada, que recibía’l gallardón mui emocionada.
Los ganadores
La llista de ganadores del Premiu al Meyor Cantar, qu’incorporó nel 2020 el nome ‘Camaretá’ como reconocimientu a esta agrupación cultural y musical, complétenla Toli Morilla, con ‘Azul y gris’ (2007); Herbamora, con ‘Nosh’ (2008); Alfredo González, con ‘La nada y tu’ (2009); Xera, con ‘Tierra’ (2010); Skama la Rede, con ‘Condenáu’ (2011); Asturiana Mining Company, con ‘Si nun conoces Vaḷḷouta’ (2012); Taranus, con ‘Ensin ti’ (2013); la Banda de Gaitas El Trasno, con ‘Volviche’ (2014); Anabel Santiago, con ‘La lloca’ (2016); Luis Núñez y los Folgazanes, con ‘La ñeve y la esmeralda’ (2017); Lafu y Rebeca, con ‘Les sombres de la yerba’ (2019); Rodrigo Cuevas, con ‘Rambalín’ (2020); Carla Armas y Rubén García, con ‘El que conoz a tierra’ (2021); y Algaire, con ‘Corazón y maera’ (2021).
