Publicado en Cómic

Pinín, el Tintín asturianu que percorrió’l mundu n’una madreña voladora

Álbum de ‘Les aventures de Pinín’ patrocináu por Chocolates La Cibeles

Cúmplense 110 años de la nacencia d’Alfonso Iglesias, ceador de Pinín, unu de los personaxes más importantes de la cultura asturiana contemporanea. Ver noticia orixinal

Ye un guah.e espigáu y roxu que percuerre’l mundu viviendo múltiples aventures con boína y madreñes. Llámase Pinín y ye unu de los personaxes de ficción más importantes de la cultura asturiana, anque los neños d’agora yá nun llean les sos hestories. La so figura, como la de los sos tíos Pinón y Telva, ta representada en murales, figures ya inclusive n’una escultura qu’encarna’l so vehículu habitual, el madreñogiro, instalada nel aeropuertu d’Asturies. El so ceador foi Alfonso Iglesias, quien anguaño celebraría’l so 110 cumpleaños. Si nun finara en 1988, la so fiesta de cumpleaños sería multitudinaria.

Alfonso Iglesias López de Vívigo nació en Navia en 1910. Estudió Químiques, pero dedicó la so vida a la ilustración. Previu pasu polos periódicos Rexón y La Voz d’Asturies, empezó a publicar les sos viñetes en La Nueva España, qu’empecipió la so andadura en 1936. En 1940 nació la pareya formada por Pinón y Telva: él d’Uviéu con boína y paragües y ella de Xixón, vistida col traxe rexonal con pañoleta na cabeza incluyíes. Dambos calzaos con madreñes [un zuecu de madera propio de la tierra], de xacíu. En 1943 llegó Pinín «que de Pinón ye sobrín», que les sos primeres hestories publica en forma de hoja dominical nel suplementu infantil del diariu.

Javier Cuervu, periodista de La Nueva España y autor de la biografía Alfonso, cronista sentimental d’Asturies (1995), esplica a el Diario.es que: «tuvo un ésitu enorme ente los llectores de la posguerra. Dellos neños encarnaron a Pinín en desfiles multitudinarios, el primeru a partir de les aventures del periódicu cuando ‘tornó’ nel so helicópteru llamáu ‘madreñogiro’ y fueron recibi-y a la estación del Norte d’Uviéu, coincidiendo col final de la so primer aventura». Foi un actu similar al que se realizó en Bruxeles con Tintín a la so vuelta d’El país de los Soviets.

«Hai delles coincidencies sorprendentes entre Pinín y Tintín. Tintín ye de 1929, anterior, pero veo bien dudosu qu’Alfonso Iglesias pudiera conocer el personaxe de Hergé n’Uviéu cuando entá nun llegara a España. Les aventures de Pinín son bien viaxeres y esbarriaes”, afirma Cuervu.

L´ilustrador y viñetista Alfonso Zapico coincide con Cuervu en que’l sobrín de Pinón y el reporteru belga tienen paecíos con matices: “Pinín ye xuna especie de Tintín a l’asturiana, un Spirou con boína, y les sos aventures destilaban menos sotileza. Pinín tou lo fae poles braves, a puñada llimpia, volaba n’un madreñogiro, echóse xuna novia famosa, nun se detenía énte nada. Como Alfonso nun dibuxaba les sos historietes en formatu d’álbum francobelga, sinón que solo disponía d’una tira de trés viñetes, nun taba la cosa pa sotileces”.

L’autor de Dublinés y la serie La Balada del Norte –ente munchos otros títulos– nació nel pueblu asturianu de Blimea en 1981, asina que por xeneración nun vivió la dómina de rellumanza del personaxe. Pero, como pa casi tolos asturianos y asturianes, forma parte de la so educación sentimental. «Cuando empecé a lleer cómic lleía Tintín, non les tires d’Alfonso Iglesias que se publiquen en La Nueva España de la posguerra. Pero Pinín yá taba encualláu ende, na sociedá asturiana de la dómina», comenta a elDiario.es

«Yera un personaxe qu’apaecía pintáu nos murios de los merenderos de carretera camín a la sablera, nes parés de los chigres, nos cuadros qu’afataben la see d’una peña de fútbol o d’un sindicatu. Asina que, curiosamente, puede dicise que Pinín tuvo casi tan presente na mio mocedá llectora como Tintín, anque nun pudiera lleer les sos aventures «. En 2013, Zapico ganó’l Premiu Alfonso Iglesias de Cómic en llingua asturiana pol so trabayu Cuadiernos d’Ítaca.

¿Por qué tanto ésitu?

Esa familia retratada por Alfonso Iglesias convertiose en tou un iconu, gracies a la capacidá del autor pa faer que’l públicu viérase reflexáu nes sos viñetes. Fixéronse figures xigantes pa desfiles y un montón d’oxetos que güei se llamaríen merchandising. Telva tuvo la so propia marca de xabón, como xuna influencer de la dómina, y l’empresa de chocolates La Cibeles llanzó coles sos chocolatinas una colección de cromos coleccionables coles primeres aventures de Pinín en color que fixo raxón ente los más pequenos.

Nesi costumismu afiguráu nes sos hestories hai muncha crítica a les inxusticies que se vivieron na posguerra…. Reflexó la probeza, la suciedá, la fame y fixo especial fincapié na denuncia al estraperlismo: «representáu nel gordu que se beneficia col gran tráficu, non na muyer que viende unos güevos fuera del racionamientu.

Pinín foise despolitizando col tiempu y Alfonso –roblaba solo col so nome de pila– centrase en captar la esencia del so pueblu.

Na década de los 50 camudase a Madrid por motivos de salú de la so muyer, Tina. Ellí siguió trabayando incansablemente, dibuxando pa periódicos como Enriba o Pueblu y a partir de los 60 pa TVE. En Madrid nun consiguió la sonadía que tuvo na so tierra, siquier col cómic, anque sí estrenó delles obres de teatru que tuvieron bona acoyida, afirma’l so nietu.

Él tenía 12 años cuando Alfonso Iglesias finó n’Uviéu, dempués de dellos años con problemes de salú, asina que les sos alcordances son un pocu folgazanes. Remémbra-y como xuna persona bien imaxinativa y a la que-y gustaba enforma xugar: «Fabricábanos y regalábanos como escenografíes feches de pasta de papel, paisaxes y construcciones pa los nuesos xuegos y pa los nuesos moñecos. A la mio prima Irene y a la mio, que somos más o menos de la mesma edá, faíanos muncha ilusión que polos nuesos cumpleaños o peles navidaes regaláranos coses creaes por él». Y anque yera pequenu, llegó a percibir en persona’l ciñu que la xente tenía por él n’Asturies: «Nun podíes dir con él pola cai porque tol mundu paraba y falaba con él. Travesar la cai con él nun yera posible porque nun avanzabes». Pa Cuervu, la so fama ye comparable a la de Víctor Manuel o Quini [el futbolista] nel so momentu.

Más allá de la familia de Pinín

Precisamente n’una d’eses cais uvieines captó al vuelu un comentariu qu’anició la idea del Día d’América n’Asturies, qu’anguaño ostenta’l títulu de Fiesta d’Interés Turísticu Nacional. A finales de los años 40, Alfonso Iglesias escuchó a un fabricante de xigantes y cabezudos valencianu dicir que la cai Uría [nel centru d’Uviéu] yera xuna de les más guapes d’España pa desfiles y cabalgates. Asina, encendióse-y la bombilla y diseñó un desfile n’homenaxe a aquellos asturianos y asturianes qu’emigraren a América pa ganase la vida.

Munchos fixeron dineru y volvíen de vacaciones con coches enormes, que popularmente empezaron a llamase haigas –dicíase que cuando diben mercalos ciscaben «el más caru que haiga»–asina que l’espectáculu incluyía más de 50 d’esos automóviles decoraos con llazos y banderes, bandes de música y ocho xarrés. Estes, diseñaes tamién por Alfonso Iglesias, representaben la despidida, la travesía en barcu, la llegada a los países de destín (México, Arxentina y Cuba), la vuelta n’avión yá con fortuna amasada y l’acoyida de la so tierra d’orixe.

Anque a la Sociedá Uvieina de Festexos (SOF), de la qu’Iglesias yera directivu nesi momentu, nun-y fixo muncha gracia pol dineru que diba costar, a la fin consiguiolo. L’eventu celebrase por primer vegada’l 23 de setiembre de 1950 ya inda se sigue faciendo anguaño, el 19 del mesmu mes, dientro de les actividaes de les fiestes locales de San Mateo. Ello ye que ye xuna de les cites más destacaes del so calendariu pero’l desfile ye agora tamién una reconocencia a quien lleguen dende otros países pa instalase n’Asturies. Sigue habiendo carroces, bailles, bandes de música, xigantes, cabezudos y jolgorio.

Ye un exemplu d’hasta ónde podía llegar la so imaxinación. Amás de viñetista, foi autor d’obres de teatru, pintor d’acuareles, cartelista y dibuxante, casi tou inspiráu n’Asturies. El so nietu Macario ye un arquiteutu especializáu na construcción con materiales naturales pa interpretar les técniques tradicionales y esplica que: «El mio güelu tien un llibru fantásticu sobro los horros, dibuxó enforma sobro l’arquitectura tradicional porque yera una tema que-y interesaba enforma. Y pasóme el tar trabayando nos planos d’un horru que se va a reconstruyir y que dalgún compañeru mandárame les semeyes del so llibru, de les sos investigaciones, ensin saber que yeren del mio güelu».

Pero quiciabes los cartelos sían lo más destacable del so trabayu fora de les tires risibles. Para Macario: «tienen per un sitiu el so valor artísticu porque son formosos, pero tamién el d’afigurar lo qu’asocedía nuna dómina nuna sola pieza. Hai munchos y bien variaos. Amás, a nivel personal yo crié con ellos, taben na mio casa». Agora, munchos atópense nel Muséu del Pueblu d’Asturies, en Xixón, qu’en total tien un fondu de 291 trabayos d’Alfonso Iglesias, de los que 236 fueron depositaos pola familia. Xuna de les últimes donaciones foi’l conxuntu de figures que representen a Pinín, Pinón y Telva a tamañu real. Son obra de la so nieta María Iglesias, que ye escultora y creales en 2010 pa una esposición que conmemoraba’l centenariu de la nacencia del so güelu.

Joaquín López Álvarez, director del Muséu, comenta que dende la institución tamién mercaron más cartelos roblaos por él. Como cartelista sí tuvo un ésitu considerable fora de la so tierra y atópense nel mercáu: «Agora mesmu tenemos unu qu’inda nun presentamos y que ye buenísimo, de promoción turística d’Asturies. Acabar de consiguilu en Nueva York. Ta editáu por Wagon Lits, la compañía de coches cama y l’empresa que quebró apocayá, Thomas Cook. El cartelu ta impresu en Madrid pero editáu por estos, qu’ufiertaben escursiones per Asturies porque teníe n xuna axencia n’Uviéu nos años 50

Nel arquivu tamién tienen cromos de La Cibeles y llibros de Pinín y ye unu de los pocos sitios nos que pueden vese. Anque les sos viñetes reeditense en distintes ocasiones y con ésitu, agora solo alcuéntrense nel mercáu de segunda mano (o quiciabes escaecíes en dalgún rincón de la casa de los güelos). «El cómic ye un arte popular, faciase pa ser publicáu, distribuyíu, lleíu, relleíu, compartíu. El so llugar nun ta na paré d’un muséu, y por eso les historietes de Pinín nun s’atopen güei en casi nenguna parte, salvo nes alcordances de la xente que les lleó», afirma Zapico.

En 1986, l’autor asistió a la inauguración d’una escultura nel so honor realizada por Felix Alonso Arena ya instalada nel Campu de San Francisco n’Uviéu. Ye unu de les reconocencies al so trabayu que llogró pero ¿recibió tou los que merez? P’Alfonso Zapico, Iglesias: «esfrutó [en vida] de lo máximo a lo que puede aspirar un autor de cómic: la reconocencia, la fidelidá y el ciñu de los sos llectores». Cuervu cunta que esi sofitu per parte del públicu garantizó-y tamién el de delles instituciones, anque matiza que: «lo del merecimientu ye complicáu desque’l cómicu Jack Benny dixo: ‘Nun merezo esti premiu, pero tengo diabetes y tampoco la merezo’. Xuna romería nel so nome como a les que diben Telva, Pinón y Pinín sería un detalle dempués de tola vida pintando anuncios de fiestes».

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *