Publicado en TIEMPU

Asturies, un oasis n’una España que va raspiar los 45 graos

La mayoría de les comunidaes enfréntese a la primer fola de calor del añu. Foto radar AEMET.

Un acomodador ordena a los bañistes na sablera de San Llorienzo, cola Policía Local de Xixón, al fondu.

El tiempu n’Asturies suel ser motivu de discutiniu. Y más inda nun branu como esti, nel que los díes de sol rellumaron pola so ausencia. Son munchos los asturianos que nagüen por más díes de sablera, otros defenden la climatoloxía local ensin fisures, y los turistes busquen nel Principáu escapase de les altes temperatures d’otres zones del país. Resulta complicáu atopar un puntu d’alcuentru ente estes postures antagóniques, pero esta ye xuna d’eses rares selmanes nes que toos tán contentos: sol y calor pero colos termómetros per debaxo de 30 graos. Con unes previsiones qu’apunten a qu’en dellos puntos del país raspiaránse los 45 graos, Asturies va ser un oasis.

España va encarar a partir del miércoles próximu la primer fola de calor del añu, que va ser la más intensa, estensa y duradera de lo que llevamos de branu con temperatures d’hasta 45 graos en puntos del sur, y que se va enllargar siquier hasta mediaos de la selmana que vien.

«La Península y Baleares enfréntense a una probable fola de calor, con valores bien alzaos de día y de nueche, que va empezar de manera xeneral y progresiva el próximu miércoles 11 y va enllargase siquier hasta’l llunes 16 o’l martes 17, colos consiguientes efectos adversos na salú de les persones y el riesgu importante de quemes forestales», manifestó Rubén del Campu, voceru de l’Axencia Estatal de Meteoroloxía (Aemet).

Esplicó que pa falar de fola de calor tienen de cumplise al empar trés factores: que l’episodiu d’altes temperatures sía intensu, estensu y duraderu, y los pronósticos de l´Aemet apunten a que toes eses condiciones van dase dende mediaos d’esta selmana.

Del Campu recordó que’l pasáu mes de xunetu España vivió díes de calor, anque siempres fueron episodios de curtia duración, pero nesta ocasión los pronósticos apunten a valores bien altos, n’ocasiones afogadices, polo que n´Aemet nun se refuga que pueda batese dalgún récord de temperatures máximes a mediaos d’agostu.

La causa d’esta primer fola de calor del añu ye xuna masa d’aire caliente que s’asitia nel norte d’África y el Mediterráneu central y que se va averar a España estabilizando l’atmósfera, polo que’l fuerte sol, l’escasu vientu y la poca ventilación van torgar que l’aire templao pueda esvalixase.

Esta situación meteorolóxica, xunida a la entrada d’una masa d’aire procedente del norte d’África que va llegar cargada de polvu en suspensión, fai «que sía más que posible» que nos próximos díes casi toa España viva la primer fola de calor del añu, aseguró’l voceru de l´Aemet.

D’esta miente, a partir de mañana martes el calor intenso va dexase sentir en bona parte de la Península y Baleares, con más de 36 graos na cuenca del Ebro, zona centro, mitá sur y puntos de Mallorca. A partir del miércoles 11, los termómetros dispárense y van algamar los 36 graos nel Pandu norte, los 38 nel Ebro, Baleares, centru y mitá sur y los 40 graos nos valles del Tayo, Guadiana y Guadalquivir, y en toes estes zones van tener o van superar los 20 graos de madrugada.

Nes xornaes siguientes va siguir l’ascensu térmicu y asina se van algamar o van degolar los 40 graos en bona parte del centru y sur de la Península, na cuenca del Ebro y en puntos de Mallorca, y mas de 42 graos a partir del xueves nos valles del Tayo, Guadiana y Guadalquivir, ensin refugar que se superen los 44 graos en dellos puntos del sur.

Les nueches tamién van ser bien caloroses toos esos díes, con mínimes de más de 22 graos a partir del miércoles o xueves en munchos llugares d’España que se van caltener siquier hasta’l llunes 16.

Solo van quedar al marxe de la fola de calor Canaries, onde a partir del sábadu 14 ye posible que xuban los termómetros, y l’estremu norte peninsular, sobremanera el norte de Galicia, puntos d’Asturies y Cantabria, anque mientres la fin de selmana podría apertar el calor na zona del País Vascu.

Les precipitaciones van ser bien escases, magar dende güei llunes y hasta el miércoles podríen producise dellos bastios aisllaos y ocasionales na área mediterráneo y Balear y en zones de monte del este y el centru, que van sumir casi por completu a partir del xueves, informa EFE.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *