Publicado en Obituarios

Finó «Sor Canción», la monxa asturianista

L’ayerana tuvo una popular trayeutoria musical, na qu’emplegó la llingua asturiana.

Activista de la música y defensora de la Llingua, grabó numberosos discos de villancicos y temes populares

María Pilar Esther Fernández Fernández, más conocida como Sor Canción finó’l pasáu llunes a los 89 años d’edá. Figura importante na defensa de la Llingua asturiana y gran activa nel campu musical, Sor Canción ingresó bien nuevu nel monesteriu de Les Pelayes y llueu empezó a destacar por creatividá.

Yá nos años 60 del sieglu pasáu, Pilar Fernández decidió abandonar el vezu benedictín pero siguió dedicándose a la ilesia y a la so pasión musical. Compunxo, interpretó y grabó numberosos discos, ente ellos, Villancicos populares, Villancicos asturianos, Cantares de Navidá, o Trobes a la madre bona. Pasó los últimos años de la so vida nuna residencia de Balmonte.

Non solo l’ámbitu relixosu llamenta la so perda. Dende’l mundu del asturianismu tamién se llamentó enforma’l so fallecimientu, como manifestó Iniciativa pol Asturianu.

El llunes finaba a los 86 años María Pilar Esther Fernández. Natural de Cuergo, con 17 años ingresó nel conventu de Les Pelayes, n’Uviéu, onde entamó a dase conocer como cantante col nome de Sor Canción.

Na década de los 60 grabó dellos discos y cenciellos como ‘Canciones de Navidad’, ‘Villancicos Populares’ o ‘Villancicos asturianos’, qu’incluyía cantares como ‘El neñu diz que tien sed’ –tamién conocíu como ‘La virxen de Covadonga’–, ‘Desvélente los amores’, ‘Yo non sé qué tien el neñu’ y ‘Vienen tres reyes magos’, temes éstos trés últimos qu’interpretó Nuberu nel so trabayu ‘El árbol de Navidá’.

Por una enfermedá de la so madre dexó Les Pelayes y tornó a Cuergo a cuidala, onde vivió hasta que la salú se lo permitió y tuvo que dir a una residencia a Balmonte. Ehí finó dexando atrás un gran llegáu musical.

Piden la recuperación del so trabayu

Tres conocer la noticia, Iniciativa pol Asturianu asoleyó un comunicáu pa reivindicar el papel de Sor Canción, que «cuntaba con unes cualidaes musicales estraordinaries que punxo al serviciu de la cultura y la llingua d’Asturies». «Foi una muyer pionera en reivindicar la cultura asturiana dende la creencia relixosa que siempres la caracterizó, primero como benedictina y dempués como virxe consagrada. La cultura asturiana tien una gran delda con esta muyer por tol trabayu que fixo por esparder dende la so visión la llingua asturiana», añade al tiempu que reivindica que’l so trabayu musical «tien que ser actualizáu, publicáu y puestu en valor colos sos testos, partitures y grabaciones pa que les nueves xeneraciones puedan siguir disfrutando d’él».

Na semeya, captura d’una emisión del centru territorial de RTVE n’Asturies nel 1990 nel que Sor Canción interpreta ‘El neñu diz que tien sed (La virxen de Covadonga)’ acompañada por Irene Llamas a la pandereta.

«L’aportación de Sor Canción a la cultura y la llingua asturiana ye importantísima. Amás siendo muyer ya entamando nos años 60»  (Inaciu Galán)

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *