Bonos díes, bona xente.
Alborecemos ente nubes ya claros y delles nublines no fonderu los valles con unes temperatures que tan alrodiu de los 8ºC, rexistrándose nel puirtu Payares 3,8ºC.
Güei vamos tener el cielu nuboso con dalguna gotera durante la tarde, les temperatures tenderán a descender llixeramente con dalguna nevada perriba de los 1800m y l’aire ábrigu dirá amenorgando a lu llargu’l día.
Mañana sábadu, día de Navidá, tendremos nubosidá media-alta entemecida ente dellos claros, siendo les nubes más abondoses na fastera surocidental y cordelera onde pue cayer dalguna gotera, sobre too pela mañana, nel restu sedrá poco probable con unes temperatures que camudarán poco, calteniéndose un ambiente suave pa la época na que mos atopamos.
El domingu la mañana sedrá seliquina y afayaiza ente nubes ya claros pero a primera hora de la tarde la llegada d’un frente atlánticu va apurrinos un aumentu de la nubosidá que vendrá acompangáu de precipitaciones que puen tener calter moderáu, amás l’aire ábrigu va dir coyendo puxu con raches moderaes a fuertes en zones altes de montaña. Les temperatures al seguir influenciaes pol atlánticu seguirán siendo suaves.
El llunes lo más destacáu sedrá’l vientu que pue soplar con raches mui fuertes en puntos de la costa ya en zones altes de la cordelera onde se puen algamar los 120km/h. Nel cielu tendremos nubosidá que mos pue dexar dalguna gotera y les temperatures camudarán poco.
Les últimes hores d’esti añu van ser seliquines y afayaizes, gracies al anticiclón Ibéricu que mos dexará escasa nubosidá y temperatures primaverales nes hores centrales del día, situación que va estendese a los primeros díes del añu viniente, de momentu nun se ve a ningún plazu un camudu radical del tiempu, seguiremos sollertes.
