Publicado en NATURA

Afayen una nueva especie de dinosauriu con traces úniques

El nuevu dinosauriu obliga a la ciencia a reclasificar casi tolos fósiles afayaos n’Inglaterra hasta agora. Científicos del Muséu d’Hestoria Natural y l’Universidá de Portsmouth describieron un nuevu xéneru y especie de dinosauriu a partir d’un espécime atopáu na Isla de Wight.

La nueva especie de dinosauriu presenta una ñariz inusualmente grande y el so descubrimientu foi posible gracies a un doctor inglés xubiláu de 64 años que pasó zarráu un tiempu xurgando en caxes de cientos de güesos vieyos. Y ellí atoparon un fósil nasal únicu. Los sos restos fueron escavaos orixinalmente en 1978 na Isla de Wight en Reinu Uníu, pero fueron confundíos col so pariente más famosu, l’Iguanodon, mientres décades hasta que los investigadores esamináronlu per segunda vegada.

Ello ye que la so paecencia resulta familiar, pero esti dinosauriu d’aprosimao 128 millones d’años, foi reconstruyíu con diversos güesos, incluyíos dalgunos del craniu, la columna vertebral y los cadriles, abondu por que el investigador Jeremy Lockwood de la Universidá de Portsmouth, identificaren una nueva especie de dinosauriu. Foi bautizáu como Brighstoneus simmondsi, n’honor al pueblu cercanu de Brighstone y al descubridor del dinosauriu, Keith Simmonds.

El dinosauriu herbívoru en cuestión, midiría unos 8 metros de llargu, pesaría unos 900 kilogramos, y cuntaría con una característica ñariz bulbosa y una boca con hasta 28 dientes.

Dalgunes de les característiques más destacaes que marquen a Brighstoneus como una nueva especie atopamoslo nel craniu del dinosauriu, como podemos apreciar na reconstrucción fecha polos espertos.

«Para mi, el númberu de dientes yera una señal. El Mantellisaurus tien 23 o 24, pero ésti tien 28. Tamién tenía una ñariz bulbosa, ente que les otres especies tienen ñarices bien rectes. En xunto, estes y otres pequenes diferencies faen que sía obviamente una nueva especie», esplica Lockwood.

Mayor diversidá de la que se creía. El descubrimientu d’esta nueva especie suxure qu’hubo munchos más dinosaurios iguanodontes nel Cretácicu Tempranu del Reinu Uníu de lo que se pensaba.

«Tamos viendo seis, seique siete millones d’años de depósitos, y creo que los llargores de los xéneros hanse sobreestimado nel pasáu», sigue Lockwood. “Si ese ye’l casu na isla, podríamos tar viendo munches más especies nueves. Paez bien pocu probable que dos animales sían esactamente iguales mientres millones d’años ensin cambeos «.

La Isla de Wight acomuñóse mientres enforma tiempu col descubrimientu de dinosaurios, ya inclusive dexó l’afayu de les especímenes cruciales que llevaron a Sir Richard Owen a acuñar el términu Dinosauria. Los autores conclúin que la descripción de Brighstoneus simmondsi como una nueva especie rique una reevaluación del material fósil de la Isla de Wight.

«Los dinosaurios británicos nun son n’absolutu daqué que s’acabara. Creo que podríamos tar nuna pequena renacencia», conclúi Lockwood.

Referencia: “A new hadrosauriform dinosaur from the Wessex Formation, Wealden Group (Early Cretaceous), of the Isle of Wight, Southern England” 10 November 2021, Journal of Systematic Palaeontology. DOI:
DOI: 10.1080/14772019.2021.1978005

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *