Publicado en Curiosidaes

Cumplinse 47 años del afayu de Lucy, ‘Madre de la humanidá’

Recreación del aspeutu de Lucy en vida – JASON KUFFER/FLICKR

Esti 24 de payares cumplinse 47 años del descubrimientu de ‘Lucy’, que’l so cadarma ye’l más antiguu conocíu d’un Australophitecus, y foi considerada como ‘Madre de la Humanidá’.

L’afayu de ‘Lucy’ pol paleontólogu estadounidense Donald Johansson en 1974 supunxo’l fin d’un alderique continuu, nel qu’unos espertos pensaben que los oríxenes más primitivos del home taben n’África, pero onde realmente se fixo humanu yera Europa.

Lucy amosó qu’asocedió n’África del Este, y más concretamente na rexón de Afar (Etiopía), onde la atoparon. Dexó dicir de manera concluyente que’l caminar argutu esiste dende fai 3,5 millones d’años, un reblincón na comprensión de la secuencia de los acontecimientos de la evolución humana.

Les evidencies de qu’esta especie caminaba irguida afayase na maxana, sosprendentemente distinta a la d’un animal de cuatro pates como un chimpancé. Éstos tienen la maxana estrecha colos güesos del cadril mirando escontra alantre, ente que la de Lucy ye como l’actual, amplia colos güesos del cadril formando un concu, informa Wikipedia.

El cuerpu de Lucy inda tenía piernes relativamente curties y brazos relativamente llargos, que ye la clase d’anatomía que puede vese más n’especie que viven nos árboles. Asina que yera una ponte importante ente les qu’agora se consideren especies antigües y les modernes. La especie de Lucy, ‘Australopithecus afarensis’, escastóse fai unos 3 millones d’años y el Homo del que se tien evidencia más antigua ye de fai 2.300.000 años.

«Eso significa que’l surdimientu del nuesu propiu xéneru asocedió fai ente 2,3 y 3 millones d’años, y eso ye onde tamos buscando», declaró apocayá Donald Johansson, el so descubridor. Johansson esplicó que’l nome de ‘Lucy’ vien de que taben escuchando xuna cinta de The Beatles cuando atoparon los restos, y que ente los cantares atopábase ‘Lucy in the sky with diamonds’.

 

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *