Publicado en TIEMPU

EL NADAL Y FIN D’AÑU SEDRÁN FRÍOS.

Sábadu 19 d’avientu del 2020.

ANALÍS DE LA EVOLUCIÓN ATMOSFÉRICA PA LOS PRÓSIMOS 15 DÍES.

Si seguis otres páxines del tiempu ya inclusu na prensa comercial lleven anunciando dende fae unos díes qu’estes fiestes navidiegues van ser diferentes ya nun solu pola pandemia, a la escontra de lo que paso los últimos años onde esfrutamos de sol y temperatures primaverales, esti añu’l fríu va ser el tema de conversación que se va colar, col o sin el permisu del covid19.

Nosotros ya’l día 7 d’avientu faciemos cayer esti comentariu na nuesa predición diaria. «Queda muncho tovía pero se tan viendo ingredientes ya configuraciones que mos podríen dexar unes navidaes blanques, taremos sollertes haber si en unos díes podemos confirmar dalgo» Pues entovía esta’l tema mui abiertu, si podemos confirmar que los ingredientes los tenemos pero lo que va salir del amaguestu ta por ver.

Anque pa nueche bona y navidá tovía hai munches duldes, lo más probable ye que tengamos dalgo de nubosidá estratificada que sedrá más abondosa na fastera centru-oriental, tando más escampláu nel surocidente, emburriada pol vientu nordés que fadrá baxar muncho la sensación térmica, cola posibilidá de dalgo d’orpín, sobre too nos cordales del llitoral. La tarde de navidá tenderá a escamplar, xelando en munches zones d’Asturies, antes de que camude’l día. El día siguiente sábadu ya’l domingu tará poco nuboso pero sedrán díes mui fríos, con xelaes xeneralizaes ya temperatures másimes mui conteníes que malpenes pasarán de los 6-8ºC.

A partir d’aquí esta too abiertu, se para la circulación zonal ya un potente bloquéu anticiclónicu s’apodera del atlánticu.

SABADÚ 19 D’AVIENTU DEL 2020, ESTÁU DEL TIEMPU Y PREDICIÓN.
Alborecemos col cielu nuboso y dalguna lluvia na fastera más oriental d’Asturies con unes temperatures que tan alrodiu de los 10ºC, reixistrándose nel puirtu payares 1,6ºC.
Güei tará mui nuboso pela mañana con dalguna precipitación feble ya dispersa al mediudía con tendencia a escamplar al atapecer. Les temperatures dirán descendiendo, dándose les mínimes al finar de la xornada. L’aire sedrá variable y sele en xeneral.
Mañana domingu tendremos intervalos de nubes medies y altes que sedrán más abondoses pela tarde, sobre too na cordelera y fastera más surocidental d’Asturies, onde nun se descarta dalguna gotera o xarabatín feble ya dispersu, nel restu la lluvia nun llegará hasta bien entrada la nueche. L’aire arreciará pela tarde y sedrá ábrigu, templando dalgo les temperatures al final del día.
El llunes y martes sedrán díes mui asemeyáos con intervalos de nubes medies y altes entemecidos ente dellos claros, la nubosidá más abondosa, como ye vezu n’estes ocasiones, quedará restrixía a la cordelera y fastera más surocidental d’Asturies, onde puen tener dalguna gotera o xarabatín feble ya dispersu. L’aire ábrigu dirá amenorgando, sobre too’l martes, anque por mor del efeutu foehn que fae al pasu pela cordelera les temperatures medrarán abondu, dexándonos un ambiente casi chornosu, con másimes que tarán alrodiu de los 18ºC los dos díes.
El miércoles s’estropia dalgo y va aumentar la nubosidá con precipitaciones febles en xeneral ya un descensu de les temperatures anque nun lo suficiente pa que nieve, namás lo fadrá nes cumes más altes de la cordelera perriba de los 2000m.
El xueves alboreceremos lloviendo pero con tendencia a remitir les precipitaciones pela mañana y quedar intervalos nubosos durante la tarde, con unes temperatures qu’agora si, entamen a descender bultablemente.

 

Autor:

Maestra de Llingua Asturiana Colexu Carmen Ruiz-Tilve - Uviéu