Publicado en Documentales, RTPA

TPA estrena documental sobre la historia del himnu d’Asturies

El próximu miércoles 8 de setiembre, a les 22:15 h., Día d’Asturies, la TPA va estrenar el documental tituláu ‘Patria Querida’, d’una hora de duración y onde se traten distintos aspectos del que ye himnu oficial de la comunidad autónoma dende l’añu 1984. VIDEU
El programa, dirixíu y presentáu pol músicu y escritor Xune Elipe, y realizáu por Javier Lueje, cola producción executiva de Goxe Producciones, ye un percorríu pelos estremaos elementos que formen la esencia d’un cantar como l’Asturies, Patria Querida: historia, característiques musicales, lletra, simboloxía, etc. Asina, fálase del so orixe inciertu, de la so estensión xeográfica, de lo que representa pa los asturianos y asturianes, de la so estigmatización, del so componente políticu o de cómo llego a convertise nel himnu oficial d’Asturies.
Too ello faise al traviés de les entrevistes, intervenciones y alcuentros ente persones venceyaes al mundu cultural, musical y políticu del país como Héctor Braga (musicólogu), Chema Puente (rabelista), Marta Mori (escritora), Ismael Arias (escritor), Andrea Joglar (gaitera), Manuel Fonseca (Diputáu na Xunta Xeneral 1983-1986), Manuel de la Cera (Conseyeru de Cultura 1983-1990), Amelia Valcárcel (Conseyera de Cultura 1993-1995), Lluis Xabel Álvarez (fundador de Conceyu Bable), Isaac Turienzo (pianista), José M. Gutiérrez (gaiteru) o Pedro de Silva (Presidente del Principáu 1983-1991). Con imáxenes d’archivu de momentos importantes nel devenir del himnu asturianu y versiones bien distintes del mesmu vamos dir conociendo tolos aspectos qu’enzarra un cantar como l’Asturies, Patria Querida.
El Día d’Asturies, xornada na que conmemoramos la nuestra identidá política y cultural, ye una fecha afayadiza pa conocer cómo y porqué un cantar como l’Asturies, Patria Querida, tan enraigonáu nel sentimientu popular, llegó a convertise nun símbolu colectivu cola so designación como himnu oficial de la comunidá autónoma asturiana.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *