Publicado en Festival gastronómicu, Uviéu

Celebración d’El desarme n’Uviéu

Celebramos el Desarme a partir del 14 d’ochobre en numberosos restoranes d’Uviéu y tamién nes sos cais. Non te pierdas nengunu de los actos que te ufierta’l Desarme2022: xornaes gastronómiques, recreaciones históriques, desfiles, esposiciones, concursos…

➕  Programa en https://bit.ly/3CNH953

El día 19 d’Ochobre, Uviéu desármase. Xornaes del Desarme 2022 que se van desenvolver ente los díes 14 y 19 d’Ochobre

La fiesta d’El Desarme ye una celebración gastronómica, la más antigua d’España, que se vien sirviendo y tastiando na ciudá dende fai más de 180 años y que concita en redol a la mesa, principalmente en chigres y restoranes, pero tamién en cases particulares, a miles de persones con un indispensable menú: cocíu carmelitano (garbanzos con bacaláu y espinaques), les primeres dureces de la temporada y arroz con lleche.

Uviéu ARMÁU antes del DESARME. Una recreación histórica per tolo alto pa recordar qu’un 19 d’ochobre de 1836 les cais de la ciudá d’entós, que nun yera la de güei, sufrieron una batalla ente carlistes ya isabelinos.

La base histórica de la fiesta, d’Interés Turísticu Rexonal, ta nes guerres carlistes anque sobro’l so orixe hai distintes versiones.

La más aceptada asegura qu’allá por 1856 y pela rodiada d’Uviéu, unu de los bandos esfrutaba d’una bayurosa comida que tenía como platu principal garbanzos con bacaláu y espinaques, descuidu qu’aprovechó l’enemigu pa roba-y les armes.

Otra interpretación unvia al 18 d’ochobre de 1836, cuando Uviéu llogró repeler el más fuerte de los ataques carlistes, tres lo que la ciudá conmemoró la so victoria con un menú compuestu por garbanzos con bacaláu, orixe del platu principal del menú del Desarme.

Inclusive hai xuna tercer versión. Dizse que los uvieinos, ensin medios pa encarar un asaltu a la ciudá, dexaron entrar a los enemigos y convidáronlos «a una fartura» col consabíu y contundente potaxe, que los llevó a l’apigazadura y al pigazu, momentu qu’aprovecharon pa roba-yos l’armamentu.

Güei ye, sía que non, un día nel qu’amigos, familiares, compañeros de trabayu o colegues comparten mantel en redol a un mesmu menú y con llargues sobremesas. Xuna cita culinaria na que la hostelería espera sirvir más de 40.000 menúes n’unos 70 establecimientos.

Les Xornaes: Menú y Bocaos

El Conceyu d’Uviéu, en collaboración con OTEA (Hostelería y Turismu d’Asturies) y el Gobiernu del Principáu d’Asturies entama les Xornaes del Desarme 2022 que se van desenvolver ente los díes 14 y 19 d’Ochobre y qu’inclúin los proyectos de: Menú del Desarme, que se va sirvir ente los díes 14 y 19 colos componentes tradicionales: cocíu carmelitano, dureces y arroz con lleche; y Bocaos del Desarme, que se va ufiertar ente los díes 14 y 23 d’ochobre creando xuna ruta de pinchos y mini tapes qu’incluyan siquier xuno de los ingredientes del menú: garbanzos, bacaláu, espinaques o dureces (callos).

Recreación Histórica

 

 

En 2019 entamaron a realizase recreaciones históriques de les diverses batalles que socedieron en 1836 y que son orixe del menú del Desarme coles mires de conmemorar esta cita añal y potenciar la participación de la población nella.

Nestes recreaciones, desenvueltes na Plaza de la Catedral y el Parque d’Iviernu, intervinieron barganal de cien actores y figurantes afatiaos colos sos uniformes orixinales, les armes, cañones y demás completos, tantu a cuerpu como a caballu.

Concursu de Vestimienta de Dómina

Anguaño, per primer vegada convocóse un Concursu de Vestimienta de Dómina, que los sos participantes integren tamién nel desfile de les recreaciones históriques. El Certame, con grupos formaos dende los Centru Sociales, ye otru elementu para incentivar la participación na celebración del Desarme. Ta entamáu pol Conceyu en collaboración con OTEA, la Confrería del Desarme y el periódicu La Nueva España y cuenta con patrociniu de Caxa Rural. La convocatoria ye para tolos que quieran amarutase con traxes de sieglu XIX, con esceición d’uniformes militares. El certame desenvolveráse’l sábadu día 15 a les 17,30 nel Paséu d’El Bombé del Campu San Francisco y los participantes van desfilar dempués pel centru de la ciudá.

Gran Capítulu de la Confrería

Ese mesmu sábadu 15 d’ochobre, la Confrería del Desarme va celebrar el so Gran Capítulu, anguaño yá na so X edición. La Confrería, que’l so oxetivu ye “contribuyir a caltener la tradición gastronómica”, va xuntase na Aula Magna del edificiu históricu de La Universidá y pasáu el mediudía, va desfilar escontra la plaza del Conceyu y antes, sobre al 1 de la tarde, va lleer el pregón de la fiesta na plaza Porlier.

Certame de Poesía

Na xunta del Gran Capítulu va apurrise’l premiu del I Certame Internacional de Poesía “El Desarme en versu”, convocáu en collaboración cola Asociación “Asturies, capital mundial de la poesía·”, l’asociación Escritores d’Asturies y el Conceyu d’Uviéu. Al Certame, que’l so fallu darase a conocer el día 12 d’ochobre, presentáronse 112 obres unviaes dende toles comunidaes autónomes d’España y dende 13 distintos países.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *