Iniciativa pol Asturianu reclama l’usu de la toponimia oficial na placa de la Puerta del Sol
Capitales gallegues, catalanes o valencienes tienen la toponimia tradicional recoyida en Madrid. Pero Asturies non. Iniciativa pol Asturianu reclamó al Conceyu de Madrid qu’igüe la nueva placa conmemorativa del «kilometro cero» de la Puerta del Sol pa recoyer la toponimia oficial asturiana. Esta instalación, que representa’l puntu exactu onde naz la rede de carreteres radiales del Estáu, remocicóse recién con motivu de les obres de la céntrica plaza.
Sicasí, el lletreru que marca les distancies de Madrid col restu de capitales provinciales namás recueye la forma deturpada del Conceyu d’Uviéu, en contraposición colo que fixa’l Decretu 14/2019, de 13 de marzu. Esi documentu establez que’l nome oficial de la ciudá ye Oviedo/Uviéu.
La placa, por contra, sí recueye la toponimia tradicional d’otres capitales como Ourense, A Coruña, Girona, Lleida, Alacant y Castelló de la Plana. La organización de reivindicación llingüística solicita la inclusión de la toponimia oficial asturiana na placa conmemorativa del «kilometro cero» recientemente instalada. Esta petición coincide cola quexa que treslladó l’alcalde de València al de Madrid pola ausencia de la toponimia oficial de la capital de la Comunidá Valenciana y que solo apaez na forma deturpada na nueva grafía de la icónica placa de la Puerta del Sol.
La Puerta del Sol en Madrid ye la protagonista de munchos eventos públicos. Equí nun hai momentu del día, nin de la nueche, nel que nun asoceda daqué. Sicasí, lo que munchos turistes nun saben ye que nesti llugar atopa’l kilómetru cero. En 1950 asitióse la Placa del Kilómetru Cero frente al edificiu de la Casa de Correos para indicar el llugar esactu dende’l que se miden les distancies de les carreteres nacionales.
Esta importante placa indica l’orixe de los seis primeres carreteres radiales d’España: País Vascu, Cataluña, Valencia, Andalucía, Estremadura, Galicia.
La placa ta fecha de granitu y latón. Nella podemos ver la figura d’España, colos seis carreteres nacionales partiendo del centru, que se marca con un círculu. D’esti círculu salen tamién dos fleches escontra l’este y l’oeste.
Más embaxo hai dos escudos. El de la esquierda ye l’emblema del Colexu d’Inxenieros de Caminos, Canales y Puertos. Per otru llau, el de la derecha ye l’antiguu escudu de Madrid, cola icónica figura del Osu y el Madroño.
El llugar qu’agora ocupa’l kilómetru cero tuvo nel pasáu ocupáu pol Hospital del Bon Sucesu, un edificiu nel que se vivió gran parte de la hestoria de Madrid mientres los últimos sieglos.
