Publicado en Samaín

Llega la Nueche d’Ánimes, el pasu del branu al iviernu

Calabaza Nueche d'Ánimes

Esta nueche ye la Nueche d’Ánimes, xornada que na tradición celta marcaba’l pasu del branu al iviernu, cuando la escuridá gana a la lluz. A los nuesos díes llegó tamién como Difuntos, una celebración mui de nueso que caltién munches tradiciones magar que’l mediáticu Halloween estauxunidense ganara visibilidá nestes décades últimes. Fonte: Asturies.com

El Samhain o Nueche d’Ánimes, como se conoz n’Asturies, ye una fiesta de transición y d’apertura al otru mundu, yá que nesta fecha los celtes creíen que los espíritu de los muertos tornaben al mundu de los vivos. Son munchos los rituales que se faen esta nueche y ente les tradiciones qu’entovía lleguen a la nuesa fecha ta l’afuracamientu de nabos, anque tamién de calabaces, que se solíen colocar nos cruces de camín nel pasáu.

Pa conocer un poco más d’esta fecha recordamos esta crónica de la charra ‘El Día Difuntos na tradición asturiana’, entamada pola Lliga Celta d’Asturies, que punxo Alberto Álvarez Peña. ¿Cómo celebres tu la Nueche d’Ánimes? Nesti reportaxe de ‘A la Gueta los Suaños’ tamién pues garrar delles idees.

Tornes los eventos multitudinarios

A diferencia de los años anteriores, por mor de les restricciones pola situación sanitaria pola pandemia de COVID-19, esti añu tornen los eventos multitudinarios pa la Nueche d’Ánimes. Tamién llega la normalidá a los cementerios de cara a la xornada de mañana, Tolos Santos, na que los ciudadanos acuden a estos espacios a visitar a los sos seres queríos finaos.

La celebración que más xente axunta ye la de l’Asociación Vecinal La Serena, del barriu xixonés d’El Llano, que lleva años entamando actividaes pa festexar Samaín emplegando la llingua asturiana na cartelería. Pa esta ocasión recupérense les verbenes, qu’esta nueche va protagonizar el grupu Assia, y pa esta tarde tán preparaos dellos talleres infantiles y un concursu de mazcaritos.

El Conceyu de Mieres recupera tamién la so celebración de Samaín col ‘Nun ye Halloween, ye Samaín’ na plaza’l Requexu. A les 17.30 hores hai un desfile dende la Casa Cultura; a les 19 hores van entamase xuegos, animación infantil y cuentacuentos con Elisabet Martín Teatro; y a les 22 hores va ser el turnu de la música con DJ Masip.

En Gozón promociónase d’igual forma dende les instituciones Samáin con una programación na que s’inclúi’l VII Concursu de Calabaces nel parque Zapardel de Lluanco dende les 19 hores. Enantes, a les 18 hores, va entamase un amagüestu y una esfoyaza, organizaos polos coleutivos Cultural Fumañeda Santolaya y Fuente L’Ordoño, y l’actuación de la Bandina La Xarangana depués del concursu.

Corvera, mentes apuesta por referise a la celebración como Nueche d’Ánimes. El Llar conviértese nuna Casa del Terror pa públicu familiar con menores de 12 años, de 18 a 20 hores, y p’adultos y mayores de 12 años de 20.30 a 2 hores.

Tamién la Nueche d’Ánimes hai programación en Llanera. Los más mozos, de 4 a 12 años, van contar con un Baille d’Ánimes de 19 a 20.15 hores, na plaza de La Habana de Posada, mentes que los mayores de 12 años van poder disfrutar de teatru d’inmersión de 20.30 a les 22, entrambes actividaes de baldre anque ye necesario inscripción previa.

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *