Publicado en Conseyería d´Educación, Deportes

La Fundación Escuela de Mareo va crear escueles inclusives en toa Asturies

Robla un conveniu cola Conseyería d’Educación pa llegar a tolos colexos d’educación especial del país.

Los centros onde va haber estes escueles inclusives son los de Castiello Bernueces (Xixón), Llatores (Uviéu), San Cristobal (Avilés), Santuyano (Mieres), el Juan Luis Iglesias Prada (Llangréu) y el CPEB de La Puela (Allande).

La Fundación Escuela de Mareo Real Sporting de Gijón va crear escueles inclusives nestos centros p’aplicar la metodoloxía integral desendolcada estes temporaes en Mareo col equipu ‘Genuine’. Asina, búscase promocionar la calidá de vida y la inclusión del alumnáu al traviés del fútbol.

La conseyera Carmen Suárez Suárez robló l’alcuerdu esta mañana n’El Molinón xunto con Germán Robles, direutor xeneral de la Fundación, que tuvo acompañáu pol vicepresidente del club Javier Martínez y Joaquín Alonso, responsable de Rellaciones Institucionales, amás de representantes del equipu ‘Genuine’ de la entidá. Tamién acudieron al actu los direutores de los centros de Castiello Bernueces, Llatores (Uviéu), San Cristobal (Avilés), Santuyano (Mieres), Juan Luis Iglesias Prada (Llangréu) y el CPEB de La Puela (Allande), asina como dellos escolinos, que pudieron conocer el centenariu campu xixonés.

«Equí hai cantera, asina que tenemos qu’aprovechala», animó Suárez. Pela so parte, Joaquín apuntó qu’esti alcuerdu va permitir “facer de Mareo una exa de confluencia ente valores, deporte y inclusión».

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *