Namás entrar nel colexu Carmen Ruiz-Tilve de La Corredoria, el visitante atopase con unes frases dedicaes a la escritora, catedrática xubilada de Didáctica de la Llingua y Lliteratura na Universidá d’Uviéu y cronista oficial de la ciudá. Rematen con «ciñu para la maestra de maestres y maestros». Y, efectivamente, nel centru dan clase docentes que fueron alumnes de Ruiz-Tilve na Universidá, ente elles la directora, Adriana González.
Pero’l maxisteriu de Ruiz-Tilve estiéndese más allá ya impulsó un concursu lliterariu que lleva’l so nome empobináu a alumnos de quintu y sestu cursu, que celebró va unos díes la segunda edición y que’l so tema, escoyíu pola escritora, foi «El mio cole y yo». La cronista oficial d’Uviéu, qu’apurrió los premios, «participa nos actos qu’entamamos», afirma González, que manifestaba apocayá que recordaba les sos clases «como los meyores de la carrera».
Ruiz-Tilve declara sentise «bien contenta col colexu», que «empezó siendo pequenu» y foi creciendo. Les sos neñines formen parte del equipu de 55 profesores qu’empón la formación de los 659 alumnos que cursen los sos estudios nesti cursu nel centru allugáu en La Corredoria. Ye’l centru escolar de más recién construcción d’Uviéu nuna zona n’espansión, na qu’hai otros dos colexos públicos.
Nesti equipamientu educativu, toles families pertenecen al AMPA (Asociación de Madres y Padres d’Alumnos). Col modelu pedagóxicu enllantáu, ensin llibros en nengún de los cursos, ye esti colectivu’l que s’encarga de la xestión del material. «Cada familia apurre 100 euros de primeres de cursu y esa cuantía da pa les necesidaes de too l’añu, les escursiones y otru tipu d’actividaes», esplica Pilar Suárez, presidenta de l’AMPA. «Remanamos diez cuentes del bancu, la de l’asociación y les de los distintos niveles y xestionamos les beques y les actividaes estraescolares», añede.
Dende les instalaciones, los alumnos ven los primeros movimientos de tierra pa construyir el que va ser l’institutu más grande d’Asturies, el centru al que podríen treslladase una vegada concluyan los sos estudios en Primaria. Tamién les families, que lo reclamaron en numberoses ocasiones énte la saturación del actual, saliendo inclusive a la cai a protestar, miren a les obres de la futura infraestructura con ciertes duldes pol ritmu d’execución.
Queda tiempu por que se treslladen los que tienen anguaño 3 años, qu’ocupen el primeru de los edificios inauguraos del colexu, que funciona dende 2011. «El xuegu y los xuguetes ye’l proyectu nel que trabayen esti cursu. Primero analizamos con qué entretienen los neños agora y dempués cuál yera l’entretenimientu de los sos padres, pa lo que vinieron les sos families», manifiesta Sonia Alcalde, coordinadora del nivel de 3 años. Remata’l programa estudiando «cuálos son los xuegos de los neños n’otros países del mundu», apunta.
Les mañanes empiecen nesta etapa d’Infantil con una asamblea. Los escolares, nel so primer cursu nel centru, siéntense nel suelu frente a la profesora pa conocer qué ye lo que van faer a lo llargo de la xornada escolar. Los alumnos de 4 años tán somorguiaos nun proyectu sobro’l cuerpu. «Primero estudiamos cómo ye’l cuerpu per dientro y agora comprobemos cómo me siento», sostien Elena Fernández, coordinadora de la etapa de 4 años, qu’añede que cuntaron nesta xera cola collaboración de los familiares que trabayen na área sanitaria.
N’otra de les aules, neños de 5 años, coviértense n’esploradores. Conocen países embarcándose en viaxes como’l de Marcu Polu a China. Unu d’estos últimos díes tocaba los polos y cada escolar estudiaba unu de los animales pa esplica-y lo a los sos compañeros. A Álex Martínez tocó-y el llobu árticu. «¿Qué come?», pregúnta-y la so profesora Beatriz González, a lo que contesta: «Caza en menada».
Mentanto, un grupu d’escolares d’Infantil garrasti a una sesión de cuentacuentos. Los sos compañeros de cuartu cursu lleen y escenifiquen pa ellos «Les xirafes nun pueden baillar». En Primaria, los alumnos del últimu cursu, sestu, enceten el proyectu Mochileros per Europa». Partiéronse los países y estudiáronlos, trabayando delles asignatures. Busquen diversa información, indica’l coordinador, Mario Blanco, «sobro’l relieve, la climatoloxía, los paisaxes, el sistema políticu, la población y el sistema económicu». Tamién van ellaborar un cuentu, que se va tresformar en representación teatral.
En quintu tán somorguiaos nel proyectu «#Espacio democracia». Los estudiantes recoyeron, primero, unos datos na cai, al traviés d’una encuesta. Informáronse asina de cuestiones como de cada cuántu celebren les elecciones o de quién son los presidentes de la Xunta Xeneral o del Gobiernu rexonal. Al respective de esti últimu cargu, detuviéronse nel estudiu de los nueve xefes del Executivu autonómicu.
Cada grupu céntrase n’unu d’ellos y arrexunta los sos datos pa dempués van realizar la esposición pa toos. Iker González y los sos compañeros comparten información sobro Javier Fernández. «Foi secretariu de la FSA», afirma l’estudiante, primero que los alumnos que realicen el trabayu con él apurran más datos: «Nació’l 7 de xineru de 1948» y «foi director de Mines», dicen.
«Inventos y descubrimientos» ye otru de los programes que se desenvuelven nel centru, que trabaya tamién na concienciación pa curiar al planeta. Y proxecten un viaxe al Cabu Peñes y al Muséu Marítimu d’Asturies centrándose primeru nos accidentes xeográficos, pero iguando tamién un presupuestu pa realizar la visita.
Les tertulies lliteraries y artístqiues dialógiques, que s’empecipiaron esti cursu cola formación en rede del profesoráu xuntu al del IES Pérez d’Ayala, figuren tamién ente les actividaes, asevera Isabel Alonso, tutora de tercer cursu. Y un peluche viaxa a distintos países del mundu, de lo que dexen constancia los alumnos, y cada fin de selmana vase con un escolar a casa, que capta imaxes de los llugares a les que lo lleva.
Un aula del colexu ta acutada pa la radio. Los micrófonos y los cascos esperen polos alumnos, que faen los sos galanes, faciendo entevistes. La organización del centru ye «complexa» por cuenta del so valumbu, afirma la directora. Ayuden nesta xera les pantalles dixitales qu’informen de les sustituciones de los profesores que nun pueden allegar a clase. L’equipamientu educativu, que dispon de serviciu de comedor escolar, tien dos biblioteques y dos conserxes, unu pa cada edificiu. El colexu Ruiz-Tilve, sol influxu de la maestra de maestros»
