La Carta» del discu de Mapi Quintana ‘Música Pa Tornar Páxaros’ (2023).
Asina fala l’artista d’esti cantar: «Yera l’ añu 38. Nun sé si yera febreru o marzu cuando metieron a Luis Álvarez Tuñón, el mi bisgüelu, na cárcel d’Uviéu acusáu falsamente de roba-yos los zapatos a unos prisioneros de los que taba al cargu. Dempués d’ un xuiciu completamente irregular, como tolos que se llevaben a cabu polos franquistes, fue condenáu a muerte. L’once de mayu del 38 fue fusiláu y tiráu na fosa común d’ Uviéu. Colos años supimos que y-habíen concedío l’ indultu, pero dalguien retuvo esa carta col documentu en Campumanes y nun llegó a tiempu pa evitar la execución. Nun llegó la carta que funde barrotes. Nun llegó la carta que para las balas».
LA CARTA Lletra: Álvaro Pantoja y Mapi Quintana.
Música: Mapi Quintana.
Asesoramientu llingüísticu: Fernando Balbuena
«Música pa tornar páxaros», l’ encargu que me fizo el Principau d’Asturies pa inaugurar la programación d’Asturies nel Festival Intercélticu de Lorient.
La tierra ta frío, muéyame la cara y llega la muerte en cada palada. Recuerda esti día, fiyina del alma: que la nuestra memoria nun sea olvidada. Allá en Campumanes quedó una carta que funde barrotes y para las balas. Allá en Campumanes, allá en Campumanes. Esta madrugada del once de mayo avienta’l mio nome montada a caballo. ¡Dicen que me matan, dicen que me matan! Dicen que me matan por querer roba-yos a los prisioneros los negros zapatos. Cuando a l’alborada me tean disparando, voi dicir a voces co’l puñu bien altu, que te quiero muncho, mio futuro alao. Yo voi pa la tierra, tú pa’l aire claro. Nun llegó la carta que funde barrotes. Nun llegó la carta que para las balas.
Mapi Quintana presenta n’Asturies Música pa tornar páxaros
Esta obra musical incluye un repertoriu compuestu a costafecha pal conciertu inaugural del Festival Intercélticu de Lorient, onde Asturies foi la convidada d’honor, según esplicó esta mañana’l director xeneral de Política Llingüística del Principáu, Antón García, xunto a Mapi Quintana.
Los más de los temes tán escritos n’asturianu y inclúyese un cantar en castellanu de Cris Zagaleja, autora y panderetera vallisoletana. El repertoriu contién principalmente música orixinal, anque tamién hai cantares tradicionales de Ḷḷena, conceyu de la propia Mapi Quintana.
Van sentise melodíes asturianes a trés voces, onde l’harmonía va llevar al públicu a dómines más modernes y estétiques, inspiraes principalmente na música impresionista y el jazz. Tamién va haber espaciu pa la improvisación, tanto solista como en grupu.
Mapi Quintana va tar acompañada nel escenariu por César Latorre (pianu), Sonia Cartón (voz y sintetizador), María Sanmiguel (voz y violín), Thomas Welvaadt (trompeta) y Juanjo Díaz (percusión). L’arte visual de Marina Durany tamién va tener una relevancia especial nesti conciertu, completando estéticamente la escena y representando visualmente les emociones que tresmiten los cantares de Música pa tornar páxaros. L’espectáculu rinde homenaxe al artista desapaecíu Elías García y a toles persones que nos dexaron nestos últimos años de pandemia.
