Publicado en Feries, Ponga

Los participantes caltienen vivu un festexu nel domingu anterior al martes d’Antroxu.

Cinco mozos a caballu pelos pueblos de la parroquia de Cazu

Cinco mozos, acompañaos por un gaiteru, cumplieron esti domingu cola tradición del Aguilandu a caballu pelos pueblos de la parroquia de Cazu, nel conceyu de Ponga. Los participantes caltienen vivu un festexu que siempre se celebra’l domingu anterior al martes d’Antroxu.

Al final nun s’animó nenguna moza y fueron cinco mozos, toos ellos solteros y acompañaos por un gaiteru, los qu’esta mañana salieron a caballu a pidir l’aguilandu pelos pueblos de la parroquia de Cazu.

Los participantes caltienen vivu un festexu que siempre se celebra’l domingo anterior al martes d’Antroxu pero reconocen que, pa garantizar la so supervivencia, necesiten incorporar tanto a los casaos, invitaos dende hai años, como a les muyeres.

Montaos a caballu, unes montures engalanaes con flores de papel, los mozos salieron de Sellañu pa pidir l’Aguilandu. Yeren pocos y toos solteros, pero con munches ganes de caltener viva esta tradición tan querida na parroquia de Cazu.

Al igual que ficieron años atrás colos casaos, quisieron contar con dalguna aguilandera pero nun s’animó nenguna. La voluntá de renovar la fiesta sigue ehí, polo que reiteraron la invitación.

Ta por ver lo que socederá nel futuru, pero dalguna moza yá lo ta pensando.

En pueblos como Cazu y Ambingue, los primeros que percorrieron, los mozos visitaron a los vecinos nes sos cases pa qu’éstos-yos fueren entregando l’aguilandu.

A diferencia del gaiteru Oscarín Fernández, que diba a caballu como un mozu más, el cantante Tino Rozada fizo’l percorríu a pie con ellos y dedicó-yos un nuevu tema, ‘Vivan los aguinalderos’.

Ente’l públicu, casaos que corrieron l’Aguilandu hasta hai poco y qu’agora tienen obligaciones familiares y munchos mayores, que recordaben cuando décades atrás, nesta fiesta, podíen llegar a participar hasta 30 ó 40 aguilanderos.​

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *