El negru futuru del urogallo: «Nun hai solución; escastase/extínguese»
L’urogallo cantábricu escastase irremediablemente. La especie vive una situación crítica, ensin que nenguna de les acciones que s’impulsen para favorecer la so recuperación tean dando resultancies positives. Queden apenes 300 exemplares nel Cordal Cantábricu, y bien pocos machos reproductores. Esi númberu asitiase por debaxo de la población mínima vidable para la supervivencia d’esta subespecie pelos sos propios medios. Yá s’escastó en Galicia y en Cantabria, y queden bien pocos exemplares n’Asturies, pos el gruesu de la población ta en Llión.
- Urogallo: semeyes / Distribución actual / en Castilla
- Ficha de SEO/BirdLife sobro’l urogallo
- Folletu del proyectu Life+ Urogallo Cantábricu (2016)
El futuru del urogallo cantábricu (Tetrao urogallus cantabricus), declaráu en peligru d’estinción en 2018, aldovínase “bien negru”, señala Nicolás López-Jiménez, doctor en bioloxía, ecólogu y delegáu de SEO/BirdLife n’Asturies.“Nun hai solución, escastase. La situación de la especie ye terminal, anque hai que siguir intentando salvala hasta’l final”, apunta Adrián Vigil, presidente de la Coordinadora Ornitolóxica d’Asturies y guarda del mediu natural del Principáu.
L’impactu de les actividaes humanes, les infraestructures, les quemes forestales y la fragmentación del hábitat son les principales causes del cayente de la especie. Son factores que se añaden a la endogamia, la baxa tasa de natalidá y l’elevada mortalidá de los pollos, lo que provoca que no cúbranse yá les muertes rexistraes cada añu.
Semeya: José Luis Rodríguez
L’intentu de cría en cautividá, nun centru allugáu nel conceyu asturianu de Sobrecobiu, collechó fracasu tres fracasu: non se logró reintroducir na naturaleza con ésitu nin un solu pollu dende la so apertura, en 2007. A ello súmase’l “absolutu secretismu” sobremanera lo qu’arrodia a esti centru y, por estensión, al urogallo, denunciáu por López-Jiménez, a quien nin siquier dexaron visitar l’edificiu cuando namá pretendía “ayudar” y apurrir la esperiencia de la ONG nesti campu.
“Hubo mala xestión”
El delegáu de SEO/BirdLife considera qu’hubo “mala xestión”, como al so xuiciu demuestra’l fechu de qu’esisten otres esperiencies, por casu, n’Escocia y Polonia, nes que se llograron “resultancies positives”.
El centru de cría de Sobrescobiu desenvuelve anguaño un nuevu programa de reproducción en cautividá que da continuidá a los llabores empecipiaos en 2020. Entós, namá punxeron güevos dos urogallinas de los ocho que tien el centru. Y de un total de 13 güevos, solo llegaron a nacer cuatro pollos, pero nun se llogró la so supervivencia.
Según López-Jiménez, n’Asturies hubo “mala xestión, porque esisten otres esperiencies, por casu, n’Escocia y Polonia, nes que se llograron resultancies positives.
Equí impulsáronse acciones que nun yeren urxentes, como’l control de predadores”, ente que nun se realizaron otres qu’al so xuiciu sí lu son, como “blindar los pocos montes nos que queden urogallos, llindar les actividaes y los usos perxudiciales pa la especie, y compensar afechiscamente a quien se vean perxudicaos”.
Críes d’urogallo nel centru de Sobrescobiu. Semeya: Life Urogallo
Ente eses actividaes a evitar o llindar señaló les caceríes, les carreres de monte, la construcción d’infraestructures, los tendíos eléctricos, la xestión forestal, los aerogeneradores eólicos y que nun se fixo nada pa “conectar los montes con presencia de la especie” pa revertir la fragmentación del hábitat.
Asturies, ensin plan de recuperación de la especie
“Pero lo más grave y sangrante ye que n’Asturies, onde’l urogallo ta en peligru d’estinción, nun haya plan de recuperación de la especie, contra lo que diz la llei. L’urogallo va escastase n’Asturies ensin que tenga plan de recuperación. La política de caltenimientu de la biodiversidá del Principáu ye nula”, denunció López-Jiménez.
La situación ye distinta en Castiella y Llión: sí hai plan de recuperación y tánse corrixendo los tendíos eléctricos pa evitar la muerte d’aves como l’urogallo. Tou ello nótase nos montes castellanu-lleoneses y na situación de la especie nesa comunidá, sensiblemente meyor que n’Asturies, destacó’l dirixente de SEO/BirdLife.
La Xunta de Castiella y Llión ta construyendo un nuevu centru de cría en cautividá del urogallo en Valsemana (Llión). Anque la so apertura anunciose pa les primeres selmanes d’anguaño, entá nun se produció.
Adrián Vigil resalta sobro esti puntu que lo qu’estrema a los valles y montes con presencia d’urogallos del restu ye “la nula presencia humana, de ganáu y de venaos; la inesistencia de pistes forestales o ganaderes, otres infraestructures y tendíos eléctricos; y l’esistencia de carbayeres, onde hai muncha carba, lo que supon xuna defensa muncho mayor pa la especie que los fayedales”. Otros espertos sostienen xustu lo contrario, que la carba puede constituyir un factor d’amenaza pa la subespecie.
Los predadores nun son el problema
Vigil destaca que los predadores nun paecen ser el problema del*urogallo: “Nos montes nos que ta presente hai tantos o más gatos monteses, foinos, foínes y lobos que nos demás, asina que nun son los que tán provocando’l cayente de la especie”.
“La caza masiva de machos foi’l principiu del fin”, señala López-Jiménez, retrotrayiéndose al entamu del cayente de la especie, que se cazó hasta los años setenta del sieglu pasáu. “Dempués hubo un tiempu caza furtiva, pero eso yá s’acabó”. Agora los problemes son otros. Por casu, los vallaos y alambraos d’espín, que SEO/BirdLife ta camudando polos tradicionales de madera ellí onde los propietarios de los terrenes acepten.
Unu de los alderiques que tán sobro la mesa dende va años ye la conveniencia o non d’introducir nel Cordal Cantábricu machos de los Pirineos, onde hai más de 3.000 reproductores (en Francia la especie ta catalogada como cinexética). Oyéronse opiniones pa tolos gustos, dende les abiertamente favorables a les radicalmente contraries.
López-Jiménez indicó qu’antes de dar en la reintroducción d’exemplares tien d’estudiase y evaluar si dende’l puntu de vista xenéticu ye vidable”.Porque podría suponer la desapaición de la subespecie cantábrica.
La cría en cautividá, meyor con güevos foranos
De siguío tendríen de criase en cautividá exemplares procedentes de güevos foranos, y “y de nenguna manera siguir faciéndolo colos del Cordal Cantábricu, porque’l perxuiciu ye bien de mayor que’l beneficiu que s’escuerre”.
Vigil piensa lo mesmo. Sabe qu’apurrir xenes nuevos podría significar una mayor tasa de natalidá, “pero s’acabaría colos xenes d’equí, porque la de los Pirineos ye otra subespecie”. Cree que, antes de cualesquier reintroducción ten d’analizase por qué escastar la subespecie cantábrica. “Cuando tienes un recipiente con furacos y escápate l’agua, meyor que volver echar más va ser
Dende dellos sectores arramáronse fuertes crítiques pol dineru gastáu nos últimos años n’acciones pa intentar recuperar la población de la especie, cuantimás nel programa Life+ Urogallo Cantábricu (ente 6 y 10 millones d’euros).
López-Jiménez resaltó que’l programa, encabezáu pol Gobiernu central y delles comunidaes autónomes y nel que participó SEO/BirdLife, sirvió pa recoyer “información bien potente” que dexó saber qué taba pasando col urogallo. Yera xuna “bona base”, pero “quedaron coses por faer”, por casu, “siguir col proyectu y realizar un censu pormenorizáu de la especie pa determinar cuántos exemplares queden y la so área de distribución”.
