El próximu sábadu, 10 de xunu, nel Parador de Corias, en Cangas, a les 11:00 hores
El próximu sábadu, 10 de xunu, va celebrase nel Parador de Corias, en Cangas, el XII Alcuentru de Pueblos Exemplares, entamáu pola Fundación Princesa d’Asturies. La localidá de Mual, perteneciente a esti conceyu, recibió en 2018 el Premiu al Pueblu Exemplar d’Asturies que concede añalmente la Fundación. L’Asociación Cultural y l’Asociación de Muyeres de Mual van exercer como anfitriones d’esti alcuentru, al que se va tener accesu por aciu invitación, y que va dar empiezu a les 11:00 hores.
El propósitu d’esta xornada conmemorativa ye intercambiar esperiencies y reflexones sobro cuestiones d’interés xeneral pa la rexón. Al actu tán convidaos los representantes de les asociaciones vecinales de les localidaes galardonaes a lo llargo de les trenta y tres ediciones, tolos alcaldes d’Asturies, los miembros del xuráu del Premiu al Pueblu Exemplar d’Asturies, cronistes oficiales y presidentes de los conseyos reguladores, ente otros.
La directora de la Fundación, Teresa Sanjurjo, va abrir l’actu con unes palabres de bienvenida y de siguío va intervenir l’alcalde en funciones de Cangas, José Víctor Rodríguez.
El programa que se va desenvolver de siguío inclúi:
Presentación del proyectu «Mual trabayando por un futuru», al cargu de Lorena Rodríguez, presidenta de l’Asociación de Muyeres de Mual.
Coloquio «Lugar d’alcuentru dinamizadores de la vida rural». Juaco López, director del Muséu del Pueblu d’Asturies, va analizar los espacios y acciones qu’articulen la vida social y cultural nel mediu rural y que contribúin a caltener les tradiciones, conectar col paisaxe y conocer a les sos xentes.
Van Participar tamién nesti coloquiu: Víctor García, del taller El Xoril del Cunqueiru (Trabáu / Degaña); Verónica Gutiérrez, del proxecto chigre tienda La Caleyuca (La Güeria d’Urbiés / Mieres); Beatriz Pérez, de la Bodega Vides (Cangas de Narcea), y Esteban Rapiegu, responsable de La Llibrería de Pimiango (Ribedeva). Rosa Raspies, xerente axunta d’Inoxnalón, va exercer de moderadora.
Esti alcuentru celebróse n’ediciones anteriores en diversos allugamientos, como San Esteban de Cuñaba, primer localidá en ser reconocida col Premiu al Pueblu Exemplar d’Asturies; el monesteriu de Santa María de Valdediós, con motivu del galardón concedíu a l’Asociación d’Amigos del Paisaxe de Villaviciosa (1991); nel Teatru Cine Carmen de Moreda, en siendo estremaos la Sociedá Humanitarios de San Martín, xuntu col pueblu de Moreda (2007); en Porrúa, localidá galardonada en 2005; en Castropol, Sariegu y en Ruseco —capital del conceyu de Sobrescobiu—, que les sos comunidaes vecinales recibieron en 1997, 2006 y 2009 el Premiu al Pueblu Exemplar d’Asturies; según en Torazu, Llastres, Güeñu/Bueño y Colombres, localidaes reconocíes en 2008, 2010, 2012 y 2015, respectivamente.
