L´escritora yerbata, Blanca Fernández, algama’l premiu por unanimidá con una novela curtia de fantasía urbana: “Trovadoresca” na que ye la primer edición del premiu. Blanca conviértese asina na novelista más moza de les lletres asturianes. Blanca en Facebook, en Twitter @Blancalfq,
/ 
La novela asítiase nun tiempu presente pero tien elementos máxicos y sobrenaturales que faen d’ella un exemplu claru de novela de fantasía urbana. D’ella’l xuráu destacó la frescura del so plantegamientu xuvenil, llixeru, graciosu, encantador y creyible, con un desendolcu consistente y bien filao d’elementos naturales y realistes con otros de calter sobrenatural que nun ruempe en dengún momentu’l pautu de verosimilitú y que xenera una atmósfera qu’enganchó a tolos miembros del xuráu.
La escritora de Bimenes, Blanca Fernández, tien asoleyada una bona cantidá de rellatos y premios de rellatu, y tien yá pendiente d’asoleyar la so primera novela curtia, tamién de temática sobrenatural, “L’home les Caparines” que ta yá pa ver la lluz esti mesmu añu. Blanca Fernández conviértese asina na novelista más moza de les lletres asturianes con una propuesta de la que’l xuráu conseñó tamién “la claridá de la voz narrativa, bien definida, con puxu y qu’acompaña perfechamente unos personaxes femeninos d’una fuercia que va dar de qué falar na lliteratura del xéneru”.
El Premiu Radagast, organizáu por Ediciones Radagast, ye l’únicu premiu de novela n’asturianu qu’hai d’iniciativa privada, ta dotáu con 300€ en conceutu de drechos d’edición, la edición de la obra y un diploma acreitativu. A él namás podíen presentase obres qu’entraren dientro del campu de la ficción especulativa (Fantasía, ciencia ficción y terror) y que tuvieren escrites por autores de menos de 35 años. A esta primer convocatoria presentáronse un total de tres títulos qu’esploraben les temátiques post-apocalíptica y fantástica. La Editorial, vistu l’ésitu de la convocatoria, cuenta con organizar una segunda edición pal añu 2022.
