El sábadu 7 de payares, l’equipu de zooloxía de Bioparc Fuengirola vivió unu de los acontecimientos más importantes na hestoria del parque y, por estensión, na hestoria del caltenimientu ex situ de los gorilas. La sorpresa llegó al afayar que Buu, la fema de gorila que taba preñada, fuera madre mientres la nueche.
La cría ye un machu y atópase en perfectu estáu de salú. Dende’l día de la so nacencia les persones que s’averen a visitar Bioparc Fuengirola pueden reparar a la cría cola so madre xuntu al restu del grupu.
Tol equipu de Bioparc Fuengirola celebra’l perfectu tao de salú de la madre y la cría y l’escelente acoyida que tuvo’l nuevu miembru de la familia per parte del restu del grupu de gorilas. «Toos amuésense comenenciudos pol nuevu miembru. Pero ensin llugar a dulda Wefa, la fema más nueva del grupu, ye la que s’amuesa más comenenciuda ya interesada, quiciabes pola so curtia edá o porque dende’l principiu fixo bon equipu con Buu», declaró Jesús Recuero, veterinariu de Bioparc Fuengirola. «Sía por un motivu o por otru, Wefa siempres ta abeyando per y barganal de la madre y la cría», señala.
Bioparc Fuengirola trabaya nel caltenimientu de la subespecie de gorila occidental d’enllanada dende l’añu 2004 cuando acoyó un grupu non reproductor formáu por dos femes y un machu: Kim, Sara y Ernst. Al poco tiempu, Sara, que carecía dellos alifaces de salú, finó. Años más tarde, en 2017, morrió Ernst por causa de la so avanzada edá, dexando a Kim sola. Entós foi cuando los coordinadores del programa européu de caltenimientu de gorilas determinaron que’l parque de Fuengirola, al tener una llarga esperiencia y una fonda conocencia sobro gorilas, tuviera un papel más importante nel caltenimientu de la especie n’Europa, decidiendo que recibiera un grupu reproductor.
Pa ello Bioparc Fuengirola reformó les instalaciones de gorilas y en primavera de 2018 empecipió un procesu de 17 meses nel que recibió trés gorilas pa formar un grupu reproductor. Los gorilas, un machu y dos femes, teníen distintes edaes y veníen de distintes zoos europeos. Cola so llegada, la yá vieya Kim, convirtiose na güela» del grupu y n’apenes un añu tuvo la primer cría.
Fuengirola ye l’únicu parque n’Andalucía nel que puede contemplase esta impresionante especie. Y ye, tamién, unu de los cinco parques n’España onde puede vese un grupu completu de gorilas formáu por machu, femes y críes.
Un comentario sobre “Naz en Bioparc Fuengirola el primer ñácaru gorila d’Andalucía”
Los comentarios están cerrados.