Publicado en Escritores, Sin categoría

«Poner la oreya, sentir a la xente, ye lo más importante pa un escritor»

 

«Poner la oreya, sentir a la xente, ye lo más importante pa un escritor»

El narrador polesu y maestru de primaria ta acabante algamar l’últimu Premiu Xosefa Xovellanos cola so novela ‘El fervinchu’

Sidoro Villa (La Pola Siero, 1962), escritor y collaborador d’EL COMERCIO, ta acabante ganar el Premiu Xosefa Xovellanos cola so obra ‘El Fervinchu’. Maestru de primaria, ye autor de les noveles ‘A estaya’ (2016) y ‘Tres beyuscos’ (2019), entrambes publicaes cola editorial Impronta.

–¿Qué supón pa vusté esti premiu?

–Una gran alegría. El mundu de la lliteratura n’asturianu ye un mundu tapecíu, nun hai abondos llectores, nin rescampla muncho poles circunstancies nes que s’atopa la llingua. Entós, pa los qu’escribimos, recibir un premiu ye dalgo que t’enfota a siguir nello y si arriendes ye tan prestixosu como’l Xosefa, más tovía.

–Fáleme de ‘El fervinchu’.

–Ye la historia d’una familia asturiana rural clásica. Desarróllase a lo postrero del sieglu pasáu y los protagonistes son una xente un poco bederre, conflictiva ente ellos, con problemátiques antigües, onde xira too alrodiu de la matriarca del clan. Cuéntense eses relaciones dures y difíciles, que tienen toos pol so carácter, a lo llargo d’unos pocos meses. Van asocediéndose los contactos ente unos y otros, la cosa va in crescendo col mal rollu y la posibilidá de que too acabe de mala manera. Ye lo que puedo cuntar.

–Les anteriores noveles tamién se desenvolvíen nel mundu rural ¿ye’l que-y interesa retratar?

–Tola vida me gustó esi mundu. Tengo 58 años y la época que creces y te faes paisanu a mi concidióme cola de tou esi mundu que ya diba munchu tiempu escayendo: ente los 60 y los 90, cuando se desencadena’l final de tou eso. Eses tipoloxíes de xente y el conocimientu que tengo d’ello ye bastante fondu y nes mios noveles espeyo lo que más conozo, ye lo que m’interesa contar. Agora mesmo hai un enfotu en xente que fai novela, –sobre too mozo– en falar del mundu modernu incluso futuru, con asuntos fantásticos, de terror, ciencia ficción, dalgo que me parez estupendo. Al final nun creo qu’importe l’asuntu o el tipu de xéneru. Pa que sea calidable lo que tien d’haber ye una construcción de los personaxes fonda y que sean humanamente creyibles.

–Nel so casu l’empléu d’un asturianu mui averáu a la oralidá contribúi arriendes a esa verosimilitú de los personaxes.

–Una llingua asturiana natural y lo más pura ye lo que pretendo. Los de la mio xeneración xugamos con ventaya porque conocímosla meyor, falamos nella, sentimos a los paisanos que ya van morriendo. Los que nacimos nos sesenta tovía mamemos munchisimo esi asturianu auténticu nel que creo que tenemos d’escribir. Poner la oreya, sentir a la xente, ye la xera más importante pa un escritor a la hora d’espeyalo nuna novela.

–¿Percibe esa falta de contactu directu cola fala na obra de los autores más mozos?

–Va poco hubo nes redes sociales un alderique a cuentu de si había que lleer a los nuestros clásicos. Yo creo qu’independientemente de la so calidá lliteraria hai que metese per ellos porque ehí ta la llingua como ye. Conocela parezme fundamental pa nun cayer en xiros castellanizantes, pocos creyibles, como a veces-yos pasa a xente nuevo por esi desconocimientu, del qu’en fondo tampoco tienen culpa. Por eso falaba de ventaya de los del mio tiempu que sentimos l’asturianu enantes de qu’escomenzare perdese.

–Vusté lleva abondo dedicáu a la docencia. Figúrome que foi testigu d’esa perda de la fala nes sucesives promociones d’escolinos.

–Nunca di asturianu, pero siempre di clase n’asturianu. La perda ye lo que más m’atristaya. Llevo 31 años trabayando y venti d’ellos paselos nun CRA en L.lena, ellí namoreme de la llingua, los nenos tovía nos noventa teníen una riqueza brutal que foi perdiéndose. Llevo ocho años en Lieres y nesti tiempu foi desaxeráu’l cambiu: los rapacinos usen dalgún ye, dalguna palabra oyía a los güelos, namás. Hasta empleen el pretéritu perfectu, que parecía lo último, y son de Lieres, nun falo de la cai Uría.

–Como escritor, ¿siéntese un francotirador?

–Nun te digo que non, pero tampoco nun pienso nello nin voi per ahí. Fago lo que me petez en cada momentu y ye lo que me sal pero non por querer marcar una distancia o un camín determináu.

Autor:

Maestra de Llingua Asturiana Colexu Carmen Ruiz-Tilve - Uviéu