Güei celébrase’l Día Mundial de la Eficiencia Enerxética. Esta xornada sírvenos para faenos cavilgar sobro’l consumu enerxéticu na vida cotidiana, l’usu de los recursos naturales y l’efectu medioambiental. ¿Precisamos consumir tantu? Tien como oxetivu sensibilizar a toles persones sobro la necesidá d’amenorgar el consumu d’enerxía por aciu un usu razonable y sostenible de la enerxía.
Esti día foi creáu mientres la primer Conferencia Internacional d’Eficiencia Enerxética, celebrada n’Austria, en 1998.
La eficiencia enerxética puede ayudar a protexer el planeta. Al aforrar enerxía en cada procesu o acción, tamos emitiendo menos CO2 a l’atmósfera. Con ello tamos favoreciendo a amenorgar los efectos adversos del cambéu climáticu.
Al contrariu de lo que munches persones piensen, aumentar la eficiencia enerxética nun significa comprometer la comodidá y la calidá de vida al menguar l’usu d’enerxía qu’usamos na nuesa vida diaria. Ameyorar la eficiencia enerxética basase n’optimizar los procesos de producción y el consumu d’enerxía, utilizando fontes d’enerxía anovables en desterciu de los combustibles fósiles, promoviendo’l consumu responsable y el reciclaxe, ente otros.
Según la Global Footprint Network (GFN), anguaño calcúlase que precisamos l’equivalente a 1,6 planetes p’algamar los recursos qu’utilizamos cada añu. Pa 2030 vamos precisar l’equivalente a dos Tierres, lo que podría conducir a un dañu significativu na supervivencia de la raza humana.
Podemos satisfaer toes nueses necesidaes enerxétiques menguando considerablemente la enerxía que consumimos, aumentando la eficiencia enerxética de los nuesos edificios, electrodomésticos, vehículos y fábriques.
Les inversiones n’eficiencia enerxética feches polos 29 países miembros de l’Axencia Internacional de la Enerxía (AIE) dende 1990 aforraron a los sos ciudadanos 550.000 millones de dólares hasta 2014 solamente.
Estos costos evitaos del consumu d’enerxía incluyeron 80 mil millones de dólares aforraos nel amenorgamientu d’importaciones de combustibles fósiles, lo que supunxo l’amenorgamientu en 10 mil millones de tonelaes les emisiones de dióxidu de carbonu (CO2) ente 1990 y 2015.
Entós, ¿Cómo podemos contribuyir a la eficiencia enerxética? Hai munches acciones simples que podemos faer mientres tol añu, non solo’l 5 de marzu: usar les hores del día pa les nueses xeres que riquen más llume, apagar les lluces y los dispositivos eléctricos cuando nun los usamos, reemplazar los electrodomésticos anticuaos y usalos racionalmente, priorizar el tresporte públicu o la bicicleta, etc.
