Publicado en Festivales, Música

El  Festival Interceltique de Lorient arranca güei

L Festival Interceltique de Lorient
Semeya propiedá del Festival Interceltique de Lorient.

El  Festival Interceltique de Lorient arranca güei magar les dificultaes de tener qu’adaptase “selmana a selmana” al ritmu que marca la pandemia. La última edición con Lisardo Lombardía al frente céntrase en Breizh pero “toles delegaciones lleven una representación de lo meyor”, esplica Iñaki Santianes, responsable de l’asturiana.

“Ye un añu centráu en Bretaña, pero nel que toles delegaciones lleven una representación de lo meyor”, esplica Santianes

“Yera mui importante que nun hubiere un segundu parón. Dos años ensin certame sería mui perxudicial pal festival”, apunta’l gaiteru, que rescampla l’esfuerciu organizativu pa facer realidá l’Interceltique. Reducciones d’aforu, con namái llocalidaes d’asientu nel casu del Espace Marine, y la obligación de presentar un documentu qu’acreite tar vacunáu o un negativu nun control d’antíxenos p’acceder a los conciertos son dalgunes de les midíes que van marcar esta edición, na que’l públicu va disponer d’un centru de vacunación y d’ellaboración de tests pa facilitar l’asistencia a los espectáculos.

Nellos, como asocede dende los últimos años de los 80, va haber una destacada presencia asturiana anque menos numberosa de lo habitual daes les circunstancies. En concreto van viaxar a An Oriant la banda folk Felpeyu y el compositor Ramón Prada, que va tar acompañáu por Xosé Antón Fernández ‘Ambás’, Ramsés Ilesies y José Ángel Hevia.

Dedicáu a Breizh nesta ocasión coincidiendo col cincuentenu aniversariu del Interceltique, “cada día va tener protagonismu un país”. Nel casu d’Asturies va ser el sábadu 14, a les 20 hores, cola actuación de Felpeyu nel espaciu La Bretagne Invite xunto coles bandes bretones Les Vrillés y el dúu Chaveul/Noguet, que convida pa la ocasión a Roland Coq.

‘Finisterres celtiques’

Tamién va haber presencia asturiana nel espectáculu ‘Finisterres celtiques’, el llunes a les 21 hores nel Espace Marine, un eventu especial pa conmemorar el cincuentenu aniversariu del Festival Interceltique de Lorient. Nél la Orchestre National de Bretagne va interpretar cinco movimientos fechos por compositores de dellos países pa la ocasión.

Son Frédérique Lory (Breizh), Paul Leonard Morgan (Alba), Sir Karl Jenkins (Cymru), Bill Whelan (Éire) y l’asturianu Ramón Prada, que presenta ‘Tierra’. Pa la so interpretación la orquesta bretona va contar cola collaboración d’Hevia, Ambás y Ilesies.

“Esti añu ye un festival centráu en Breizh, pero nel que toles delegaciones lleven de los meyor. La intención ye dar la meyor imaxe posible”, señala Santianes. Les dificultaes que conlleva la pandemia obliga a apostar por esti modelu pa poder sacar alantre la edición, cola esperanza de que l’añu qu’entra averase un poco más a la normalidá.

Ente les modificaciones ta l’ausencia de talleres, clases maxistrales y la mayoría de concursos, ente ellos el MacCrimmon de gaita qu’enfrenta a intérpretes mozos asturianos y gallegos. Tamién toles actividaes de cai, allugándose los espectáculos nel Espace Marine y la carpa bretona, única énte l’ausencia de los pabellones y chigres de les naciones celtes.

Bandera asturiana

Tampoco nun va haber les sesiones de le Nuit Interceltique Bretagne nin la Gran Parade des Nations Celtes, desfile de tolos participantes nel festival peles cais d’An Oriant qu’axunta tolos años a miles de persones. Nesta ocasión namái va garrar el nome de Gran Parade Bretagne y van participar decenes grupos y bandes de gaites bretones nun eventu celebráu’l domingu a les 10 hores nel Stade du Moustoir, campu del Lorient, con toles midíes de seguranza y nel que los responsables de cada delegación van llevar la bandera del so país, nel casu d’Asturies Santianes, pa facer presentes a les naciones celtes qu’acuden añu a añu al certame.

Esta actividá y los conciertos del Espace Marine va ser los eventos centrales del Interceltique, rescamplando l’espectáculu ‘Finisterres celtiques’ y les actuaciones del gallegu Carlos Núñez o’l bretón Alan Stivell, amás de la de la irlandesa Sharon Shannon y l’escocés Calum Stewart, que ta estos díes n’Asturies pa particir nel Festival Intercéltico d’Occidente y el Festival Internacional de Bandes de Gaites Villa de Xixón. “Esperamos una bona acoyida del públicu”, apunta Santianes, que recuerda tamién la importancia de la organización d’esta edición como despidida de Lombardía, que dexa la direición del festival por xubilación, col bretón Jean-Philippe Mauras como sustitutu de cara a la próxima edición, na que se va a empezar a trabayar estos mesmos díes.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *