Publicado en Curiosidaes, NATURA

La hestoria de Yakei: la primer fema alfa de macacos en Xapón

Semeya: Takasakiyama Natural Zoological Garden

En venciendo al líder de los macacos na isla Kyushu, Yakei convertiose na primer fema alfa en tola reserva natural. Yakei convirtióse na líder de la so menada de macacos na isla de Kyushu en Xapón. Ye la primer fema alfa que se conoz desque se creó la reserva natural.
Yakei, de nueve años, desallugó del tronu a Sanchu, un machu de 31 años.

Yakei nun tuvo empache en cutir a la so madre. Otra manera, en saliendo victoriosa d’ese primer alcuentru, ganóse un llugar distintu na so menada. En llugar de ser una más de la familia, los demás macacos empezaron a percibir distintu: sabíen que, con ella, nun había segundos miramientos.

Pocos meses más tarde, el líder del grupu, Sanchu, buscola para amosar el so virilidad. El principiu yera senciellu: naide podría vencer al machu más fuerte de la comunidá. Naide nunca lu había fechu. Ente 677 monos xaponeses, él fuera’l más tarrecíu per años. A pesar de namá tener 9 años, Yakei tenía otros planes.


Semeya: Getty Images

L’alcuentru diose nel Xardín Zoolóxicu Natural Takasakiyama, una reserva ecolóxica onde los monos de nieve analayen en llibertá. Esti espaciu foi destináu pol estáu xaponés pa caltener a la especie nel so ecosistema, según la cobertoria de The Guardian. Ente los árboles de los montes, Yakei nun tuvo empache en refundiase a la batalla.

En total, el macacu llanzó’l so cuerpu enteru —d’apenes 10 quilos— en contra de Sanchu. Nun pasó más d’una hora primero que les hostilidáes terminaren. Tres la derrota del antiguu líder, Yakei convertiose na fema alfa del grupu. Pa los veterinarios que monitorean la reserva, el comportamientu foi más que sorprendente.

Per primer vegada en munchos años, la tropa B» na isla de Kyushu tien una líder femenina. El camín pa consiguir esi puestu foi trabayosu. Empezó n’abril, cuando engarró contra la so madre. Güei, en venciendo al antiguu machu alfa de 31 años, Yakei engata los árboles y ximelgase, una señal típica de la especie de poder sobre los demás.

Semeya: Getty Images

Según los guardias de Takasakiyama, la nueva fema alfa ostenta’l so puestu con honor y decisión. Pa comprobar el so nuevu lideralgu, realizaron la prueba del maní’, que consiste n’ufiertar cacahuates a los animales pa ver quién los come primeru. Per primer vegada, Sanchu reculó pa dexar el llugar honorariu a Yakei, confirmando’l so estáu de líder.

«De magar, Yakei tuvo engatando árboles y solmenándolos, lo cual ye una espresión de poder y un comportamientu bien raru nes femes», señaló Satoshi Kimoto, un guía na reserva natural. Amás, según les observaciones de los guardabosques, camina cola cola arguta —una actitú dominante poco común ente los exemplares femeninos.

Dende 1952, cuando’l parque ecolóxicu fundóse, foi llar pa más de 1,500 macacos. En contraste, unos 100 mil exemplares viven inda en llibertá ente los montes de Xapón. Toos comparten una mesma característica: son animales que nun-y tienen mieu a enfrentamientos agresivos con seres humanos y otres especies. D’equí p’arriba, valdría la pena nun mirar a Yakei a los güeyos: interpretase como un desafíu, y l’agresor podría salir quebráu.


 

Yakei ye una fema macacu de la reserva natural Takasakiyama, asitiada na isla de Kyushu, al sur de Xapón. Yakei protagonizó un fechu insólitu na so especie y ye que, a los sos nueve años d’edá, quitó-y el sitiu a *Sanchu, l’hasta agora machu alfa del grupu. *Yakei convirtióse na fema alfa y agora ye la líder absoluta d’una menada que suma un total de 677 macacos.

El fechu de qu’una fema convertierase na líder d’un grupu ye daqué bien inusual nes menaes de mamíferos y, sía que non, ye daqué que solo asocedió una vegada ente los macacos de la isla de Kyushu, desque se fundara la reserva natural de Takasakiyama, fai agora 70 años.

Nos primates, esti comportamientu reparárase dalguna vegada ente los bonobos, que les sos femes suelen presentar un papel bien dominante nos grupos, y ente los lémures, que cunten tamién con estructures bien matriarcales. Pero nun s’había documentado antes ente los macacos.

La carrera política de Yakei empezó’l pasáu mes d’abril, cuando cutió a la so propia madre p’asumir el lideralgu nel núcleu familiar, lo que suel suponer el visu de poder de les femes de macacu. Pero los planes de Yakei nesti peculiar ‘xuegu de tronos’ nun se frenaron ende. El pasáu mes de xunu desafió a Sanchu, el machu alfa de 31 años que llevaba siendo’l líder del grupu los postreros cinco años. Tres una dura batalla, Yakei ganó-y y convertiose na primer fema alfa macaco conocida nesta reserva xaponesa dende la so fundación.

Los cuidadores de la reserva sosprendieronse al ver el comportamientu de Yakei y el nuevu xuegu de poderes del grupu de macacos, pero precisaben realizar un esperimentu pa confirmar si’l nuevu lideralgu yera sólidu. Asina, axuntaron al grupu de primates y ufiertáron-yos un suntuosa llacuada compuesta por cacagüeses pa ver qué miembru yera’l primeru en coyer la comida, daqué reserváu al líder del grupu. Nesi momentu, Sanchu reculó y ufiertó el primer taragañu a Yakei, que demostró a los cuidadores lo estable y afitao que ta’l so lideralgu. Siquier, hasta qu’un nuevu macacu la desafíe.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *