Publicado en TIEMPU

Estáu del tiempu: sábadu 2 d’ochobre

Alborecemos con nubosidá alta entemecida ente dellos claros con unes temperatures que tan alrodiu de los 15ºC, rexistrándos nel puirtu Payares 9,9ºC.
Güei dirá n’aumentu la nubosidá asina como la fuercia del vientu ábrigu que pue soplar con raches mui fuertes nes zones altes de montaña al finar el día. L’aire dirá emburriando nubosidá na vertiente sur de la cordelera y fastera más surocidental d’Asturies, onde puen tener dalguna precipitación. Les temperatures n’ascensu por mor del aire les castañes que mos dexará un ambiente suave y templáu.
Col camudu’l día y precediendo al frente que mos va afeutar durante’l riscar del domingu van dase les temperatures másimes del domingu y les raches más fuerte d’aire. Cola rolada de vientu a componente noroeste, tendremos precipitaciones fuertes, vendaval y desplome de les temperatures que fadrá que surda la nieve perriba de los 1900m pero yá de manera testimonial nos xarabatos postfrontales que van dase durante la mañana del domingu, remitiendo y desapareciendo pela tarde cuando van abrise dellos claros.
El llunes na alborada les temperatures sedrán fríes, tando la mayor parte d’Asturies perdebaxo de los 10ºC. El cielu va tar empuercáu de nubosidá alta y les temperatures másimes tenderán a subir.
El martes l’aire gallegu dirá apurriéndonos nubosidá que vendrá acompangada de precipitaciones febles ya un descensu llixeru de les temperatures másimes, a la escontra de les mínimes que subirán por mor de es nubes.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *