Na semeya, unes picatostes.
Una encuesta sobre cuál ye’l favoritu de los usuarios indigna en redes sociales.
«¡Votación! de estos tres postres típicos del Carnaval/Antroxu asturianu. ¿Con cuál te quedas? ¿Frixuelos, casadielles o torrijas?» entrugaba ayeri la cuenta oficial de Turismu d’Asturies en redes sociales xunto con una semeya de caún d’ellos.
Una cuestión que pronto tuvo respuestes pola sorpresa de que se-y llamara a les picatostes ‘torrijas’, nome que recibe en castellanu una comida mui asemeyada y que nun s’emplega n’Asturies.
Héboles de tou tipu, sobre manera en Twitter, rede mui dada a la interaición: les que tiraron d’ironía, les qu’amosaben la so indignación o les que simplemente esclamaben «picatostes». Precisamente a lo último del añu pasáu un grupu de cocineros y divulgadores gastronómicos asoleyaron un ‘Manifiestu pola cocina asturiana’ que propón «un activismu pa defender la cultura gastronómica d’Asturies» y que reclamaba, ente otres munches coses, «caltener los términos asturianos».