Publicado en Añu de..., Asturies, Festivales

L’Añu d’Asturies en Lorient

Na semeya, actuación de Felpeyu la tarde del sábadu nel Scène Bretagne.

La organización del Festival Interceltique de Lorient ta faciendo balance de la edición última, la del cincuenta aniversariu, con 300.000 asistentes nos diez díes de certame, enantes de ponese a trabayar a partir de setiembre no que va ser l’Añu d’Asturies. Una edición que “va valir p’amosar el potencial que tien el país no turístico y no cultural”, espresa Iñaki Santianes, responsable de la delegación asturiana.

“El primer balance que se pue facer del festival d’esti añu ye mui positivu. Había inquietú pol tol asuntu de la pandemia, pero hebo bones taquilles y bones asistencies de públicu”, apunta. Asina, tolos espectáculos del Espace Marine, qu’esti añu contó con un aforu máximu de 2.500 espectadores, tuvo entraes de más de 2.000 persones, y nel Scène Bretagne anduvo al rodiu del 80 por cientu.

En total, calcúlase que pasaron pel festival 300.000 persones, “el 50 por cientu d’una edición normal, que suel tar sobre les 600.000”. Unes cifres que dexen satisfecha a la organización, de la que sal por xubilación Lisardo Lombardía, con Jean-Philippe Mauras como sustitutu na direición.

El llavianés, al frente del certame dende’l 2007, recibió un homenaxe nuevu por parte del festival na tarde del vienres, nel que tuvo presente’l gaiteru gallegu Carlos Núñez y l’alcalde d’An Oriant, Fabrice Loher, ente otros. Una amuesa más del ciñu que dexa na población bretona.

Presencia asturiana

La delegación asturiana, daes les circunstancies actuales pola pandemia, nun pudo ser numberosa, pero dexó’l pabellón altu. “El conciertu d’Hevia, Ambás y Ramsés cola orquesta tuvo una mui bona aceptación del públicu, el movimientu asturianu de Ramón Prada gustó muncho y el conxuntu de la obra foi espectacular. Va ser un referente”, esplica Santianes sobre l’espectáculu ‘Finisterres celtiques’, qu’axuntó a más de 2.000 persones y que próximamente se verá n’otros escenarios, yá sía por movimientos concretos o de manera completa.

“Felpeyu tamién gustó muncho al públicu y la banda quedó mui contenta, con ganes de repetir nuna situación normal”, añade. Completó la representación asturiana Muga, tríu astrubretón con Clara Diez na voz que tien sede n’An Oriant, polo que, oficialmente, nun forma parte de la delegación.

Una vegada finada la edición, y llueu d’unes selmanes de balance y descansu, el trabayu va retomase en setiembre col retu d’organizar xunto col equipu nuevu de Mauras l’Añu d’Asturies. Los primeros aconceyamientos, telemáticos, van tener llugar en setiembre, onde se va valorar “tornar a 2019 o entamar una era nueva dada la situación que dexó la pandemia”.

Pa Santianes supón un retu qu’Asturies protagonice “la primer edición previsiblemente postpandémica” y cuenta con tener avanzáu’l programa “a primeros d’añu”. “L’Añu d’Asturies en Lorient va valir p’amosar el potencial que tien el país no turístico y no cultural”, celebra’l responsable de la delegación.

La importancia de la visita de Barbón

El presidente del país, Adrián Barbón, confirmaba la selmana pasada la so intención de visitar An Oriant l’añu qu’entra p’acudir al FIL nel Añu d’Asturies, que se va celebrar del 5 al 14 d’agostu. “Sería dalgo mui importante pal festival y un respaldu enorme pa la delegación”, confiesa Santianes.

Ensin dulda, “una oportunidá histórica” pol fechu de que “una autoridá d’esi nivel pueda ver de primer mano qué ye’l Festival Interceltique de Lorient y comprobar la importancia que tien”. Nun sería’l primer presidente en facelo, yá que l’irlandés Michael D. Higgins yá se desplazó a Breizh nel 2014 pa inauguración del añu del so país, anque sí’l d’una de les dos comunidaes autónomes del Estáu qu’acuden al certame, Galicia y Asturies.

 

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *