Publicado en Artículos

Tina Castañón, la primer gaitera d´Asturies

El 14 de febreru de 2019 morría en Moreda d’Ayer a los 93 años una de les sos vecines más pernomaes: Justina Castañón Sánchez. Ella, conocida y reconocida como la primer gaitera d’Asturies, aprendió a tocar el preséu a les escondidielles al escuchar al so padre, tamién gaiteru. Cuando él diba de casa, ella coyía la so gaita y practicaba. Empezó a faelo con 11 años y con 16 una vecina afayola/descubriola. Foi una pionera nesto del folclore, cobarde y bien esixente. Inspiró a munches que la siguieron y tamién al mio y a Alfonso. Porque cuando escribimos y dibuxamos a Tina La Cachera (una de les protagonistes de Carboneres) n’unu de los capítulos que, personalmente, más me gusten: «Cenices», pensamos nella.

Tamién a ella hai que da-y les gracies por sostenenos de pies.

«…Tol valle de Montecorvo compartía naquel domingu de mayu la mesma postura de plegaria y callo frente a los transistores. Bonu, casi tol valle, porque en realidá yeren pocos los vecinos que se quedaren nel pueblu aquella tarde. La mayoría, arimaos d’una allegría que nun se recordaba na zona dende los antroxos d’antes de la guerra, animárense a dir a la capital a acompañar a la so heroína particular, Tina La Cachera, que yera la tercer muyer en consiguir llegar a la final de «Saltu a la gloria», el concursu patrocináu por Chocolates La Cibeles pa Radio Asturies, la so emisora amiga, y la primera que lo faía con una gaita sol brazu. Pero sobremanera yera una de los suyos. Y eso, en Montecorvo, yera sagráu. La Cachera llamabenla nel pueblu. Trabayaba coles carboneres nes tolvas cargando y escoyendo carbón.

Ellí daba bona prueba, acaldía, de que los sos deos axilosos non yá llucíense cola gaita na mano y de que les sos agalles diben más allá d’un escenariu. Que pa eso tamién Tina yera la fía pequena de Luis Cachero, l’auténticu propietariu del preséu, y que nesi precisu momentu, ente la silicosis, la cárcel y sabe Divos cuántes palices enriba nin siquier podría dexase enllenar el fuelle d’aire.

La espectación yera tal pola presencia de la moza nesa final radiofónica qu’hasta s’entamó una comitiva de sabios y vieyes pa pidi-y a Maruxa, la xefa de les carboneres, que dexara a la moza gaitera ausentase del tayo un par de díes antes de la final. Non fora a ser que col carbón y tanta pala fora rompese un deu. Maruxa aceptó a remolera. Nun taba la cosa como p’andar perdiendo trabayadores…»

Fragmentu del capítulu «Cenices» del llibru Carboneres.

 

Autor:

Maestra de Llingua Asturiana Colexu Carmen Ruiz-Tilve - Uviéu

Un comentario sobre “Tina Castañón, la primer gaitera d´Asturies

Los comentarios están cerrados.