Publicado en Música, Novedaes

Tania Pereira asoleya’l so primer discu, con dos temes n’asturianu

L’artista de Xedré Tania Pereira ta acabantes d’asoleyar “Un Sueño Dentro De Un Sueño“, la so primer referencia de llarga duración. El trabayu contién 13 cantares de calter folk-rock alternativu con unes lletres que, según la propia cantautora, «entemecen lo murnio y lo xabaz».

Nel álbum hai dos pieces n’asturianu “Nun Vulveréi a Ser Xóven” -un poema de Jaime Gil de Biedma tornáu al asturianu por Roberto González Quevedo-, y “Entamo” -tema que s’estrenó n’esclusiva nel programa de RPA Al Son-. Les dos tán interpretaes n’asturianu occidental, la variante que se fala nel conceyu de Cangas del que provién la cantautora.

Na fueya promocional de “Un Sueño Dentro De Un Sueño“, presenten esti trabayu asina: «Ye un álbum conceptual y de reflexón. D’entamos y finales. De facese a ún mesmu les entrugues necesaries pa entender y aceptar. De cómo afecta’l pasu del tiempu al nuestru alredor, non namás na xente que queremos y los mieos qu’eso supón, sinón tamién nel mediu natural. Inspirándose munches vegaes na belleza xabaz de les montañes asturianes.».

El discu ta compuestu dafechu por Tania Pereira, artista que tocó nel grupu folk Brandal, que ye fía del tamién cantautor Pedru Pereira y que vive dende hai dellos años en Londres. Grabó esti LP nel Soup Studio de Londres y ta producíu y autoeditáu por ella y el so guitarrista Luke Bowman. Gracies al so primer single “Nun Volveréi a Ser Xóven”, Pereira ganó’l premiu AMAS a Mejor Voz y cola so propuesta sonora lleva a la música en llingua asturiana a esperimentar per nuevos soníos dientro del indie y la canción d’autor.

Sienti’l discu nes plataformes dixitales

 

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *