EL RAMU NADAL
Javier Rodríguez Fernández
– El Ramu Nadal o Ramu de Navidá ye un ornamientu d’orixe paganu recuperáu nos últimos años para la Navidá. N’Asturies la esistencia constatada más antigua ta en Coaña. Peñamellera Baxa, Cangas y Ibias.
N’Asturies «el Ramu Nadal» consiste n’una estructura de madera con forma triangular, fechu con fueyes de*texu, abetu o carrascu (xardón) nel que se ponen 12 veles simbolizando los meses del añu. Del mesmu cuelguen ufriendes, como gatafos, rosquíes y frutes, según elementos ornamentales como filos de llana, puntilles, bordaos.
L’armazón principal atopase n’una vara de madera puesto verticalmente con una peana que fai de soporte. Tamién al pie del «ramu» suelse poner un cestu con «castañes» o «nueces». N’otres zones puede ser semicircular o cuadráu.
Los oríxenes del «Ramu Nadal» paecen remontase a dómines precristianes, nes qu’el «ramu» (entendíu como una caña d’un árbol en sí), tenía un calter de cultu a la fertilidá o como ufrienda a espíritos protectores y que se celebra nel solsticiu d’iviernu como preludiu de la primavera. Ye un símbolu paganu asumíu pola Ilesia y que d’antiguo teníen sitiu ente les celebraciones navidiegues d’Asturies, Llión, Zamora y Salamanca.
La tradición evolucionó del «ramu natural» fechu con una vara d’árbol a la estructura de madera de l’actualidá, posiblemente pola influencia de los templos parroquiales onde primeramente se poníen, pa más tarde ponese dientro de les cases de forma asemeyada a los árboles de Navidá .
