L’animal, de pequeñu tamañu, foi columbráu por bañistes nel sable, yá muertu, y recoyíu por personal de Salvamentu.
Un pequeñu exemplar d’un tiburón azul, tamién llamáu tintorera, apaeció esti mediudía nel arenal de San Llorienzo. L’animal apaeció yá muertu y foi columbráu por bañistes y recoyíu por socorristes de Salvamentu. Anque esta especie de tiburones pueden llegar a tener un tamañu mediu, de dellos metros, l’exemplar apaecíu esta mañana apenes llegaba al metro de llargor y, entiéndese, yera una cría.
Los tiburones azules qu’apaecen nes sableres suelen ser de pocu tamañu, d’ente mediu metro y un metro, y trátase d’una especie inofensiva pal ser humanu, magar los espertos encamienten tener curiáu col so manexu, sobremanera si l’exemplar entá ta vivu, porque estos animales tienen dientes afilaos y sí pueden llegar a morder si se sienten atacaos, un xestu que podría asoceder si se-yos coye pola cola y asústense.
L’exemplar topáu nel arenal xixonés, señalen fontes municipales, apaeció muertu al altor de la escalera 8 y, n’avisando a la Policía Local, personal de Salvamentu fixo cargu de recoyer y de faese cargu del animal por si resulta pertinente realizar dalgún tipu d’estudiu. La cría midía unos 70 centímetros. «Nun hai nengún tipu de peligru na agua», aseguren dende’l Conceyu.
