Alborecemos col cielu empuercáu de nubes altes y con dalguna xelada nes zones más favoretibles, les temperatures tan alrodiu de los 3ºC, dalgo más pela costa, rexistrándose nel puirtu Payares 2,5ºC con vientu ábrigu.
Güei va dir n’aumentu la nubosidá media-alta pa dexanos el cielu nuble pero sin precipitaciones con unes temperatures en descensu y col aire que sedrá sele ya variable.
Mañana vienres pue llover dalgo durante’l prósimu riscar pero sedrán precipitaciones febles ya disperses que desaparecerán na alborada. Durante’l día van quedar restos de nubes medies y altes y les temperatures van subir moderadamente , amás l’aire seguirá siendo sele ya variable.
El sábadu va dir arreciando l’aire que mos dexará mui mala mar de fondu, mentantu nel cielu seguiremos con nubosidá media-alta entemecida ente dellos claros con unes temperatures que siguen subiendo.
Nel riscar del domingu cola rodada de vientos por mor d’un frente fríu mui activu va dexanos precipitaciones abondoses, un descensu de les temperatures y nieve na cordelera perriba de los 1000m, asina como raches mui fuertes de vientu al principiu, pa dir amenorgando col pasu’l frente. Durante’l día puen abrise dellos claros pero cola llegada de la tarde van volver desendolcase les nubes pa dexanos xarabatos de calter tormentosu que puen venir acompangaos de truena y xarazu na costa y ser de nieve perriba de los 1000m.
El llunes y parte del martes lo más destacáu sedrá’l vientu y la mala mar con precipitaciones febles en xeneral y un ascensu de la cota de nieve perriba de los 1600m pero paez que’l miércoles pue rolar el vientu a componente norte apurriéndonos una masa d’aire polar con muncho recorrido marítimu que pue dexanos precipitaciones abondoses y muncha nieve nes montañes perriba de los 500m pero esto yá lu diremos viendo.
