La tradición de Nueche d’Ánimes celébrase nos llares y na cai

La nueche del 31 d’ochobre ye la fecha que marcaba, na tradición celta, el pasu del branu al iviernu, cuando la escuridá ganaba a la lluz. Ye lo que celebramos n’Asturies na Nueche d’Ánimes o Difuntos, una fiesta de transición y d’apertura al otru mundu mui de nueso contaminada anguaño pol mediáticu Halloween estauxunidense.

El Samhain o, como se conoz n’Asturies, Nueche d’Ánimes o Difuntos, ye una fiesta de transición y d’apertura al otru mundu, yá que nesta fecha los celtes creíen que los espíritu de los muertos tornaben al mundu de los vivos. Son munchos los rituales que se faen esta nueche y ente les tradiciones qu’entovía lleguen a la nuesa fecha ta l’afuracamientu de nabos, anque tamién de calabaces, que se solíen colocar nos encruces de camín nel pasáu.

Mañana ye Tolos Santos, nel que’l catolicismu rinde cultu a los santos, anque la población, por cuenta de la tradición, tamién lo fai a los difuntos. Ye por ello que les persones acuden nesti día a los cementerios a visitar a sos seres queríos yá finaos.

Pa conocer un poco más d’esta fecha recordamos esta crónica de la charra ‘El Día Difuntos na tradición asturiana’, entamada pola Lliga Celta d’Asturies, que punxo Alberto Álvarez Peña. ¿Cómo celebres tu la Nueche d’Ánimes? Nesti reportaxe de ‘A la Gueta los Suaños’ tamién pues garrar delles idees.

Folixes en toa Asturies

A lo llargo de tola xeografía son munches les celebraciones que s’entamen na Nueche d’Ánimes o Difuntos que traten de reivindicar tradición separtándola de Halloween, que se ve principalmente n’hostelería o comercios. Sicasí, munches veces, pa distanciase de la fiesta estauxunidense, empléguense los términos Samhain o Samaín cuando podríen utilizase los propios.

La celebración más multitudinaria ye la de l’Asociación Vecinal La Serena, del barriu xixonés d’El Llano, que lleva años entamando actividaes baxo’l nome de Samaín con usu del asturianu na cartelería, anque esti añu ye en castellanu dafechu. Esta tarde, a les 20 hores, va contar con un percorríu de La Güestia dende’l llocal hasta la carpa instalada frente a la piscina, que llueu va acoyer una verbena.

Tamién úsase Samaín na programación especial de Xardín Botánicu Atlánticu, con toles places escosaes pal amagüestu y pa l’actividá ‘¡Te orientas de miedo’. Les dos prográmense pa la reciella mañana y son en castellanu, ensin presencia de la llingua asturiana.

En Mieres el Conceyu repite un añu más el ‘Nun ye Halloween, ye Samaín’ na plaza’l Requexu, que sí cuenta con programación asoleyada n’asturianu. A les 18 hores va entamase’l Gran Baille d’Ánimes por equipos, destináu pa neñes y neños de 6 a 12 años, y yá de nueche, de 23 a 2 hores, DJ Masip torna a animar la folixa.

Gozón, que venía emplengando Samaín pa la celebración, esti añu escueye’l nome asturianu de Nueche d’Ánimes. Va tener llugar nel parque Zapardel dende les 20 hores con un programa tamién en llingua asturiana qu’inclúi’l VIII Concursu de Calabaces, un amagüestu, música tradicional con Andecha Tuercipié y la presencia de seres mitolóxicos representaos por Compañía Vuelta y Media.

El Conceyu de Corvera tamién apuesta por Nueche d’Ánimes, anque convierte l’aguilandu nun americanizáu pola televisión y el cine ‘truco o trato’ y usa’l castellanu nel cartelu. Va ser nos comercios del conceyu pela tarde, mentes qu’a les 16.30 hores ta previsto un concursu de mazcaritos nel salón d’actos del Tomás y Valiente, un pasucais per Les Vegues a les 17 hores y una casa del terror baxo’l nome de ‘Autopista al infierno’ nel Teatru El Llar pa menores de 12 años de 19 a 21 hores y pa mayores de dende les 21.30 hores.

Tampoco nun empleguen l’asturianu en Valdés y Llaviana, onde celebren Samaín. Ta programáu un taller de calabaces (17 hores), un cuentacuentos (17.30 hores), un amagüestu (18 hores), actuaciones y, pa pesllar, a les 22 hores, una nueche de terror na Casa de la Infancia, en Ḷḷuarca, mentes qu’en La Pola entamen otru ‘truco o trato’ de 18.30 a 20 hores en comercios.

En Llanera, por contra, abandonen Nueche d’Ánimes pa usar el foriatu Halloween