- Fonte: TPA Video / La Voz del Trubia /
El ganador de la nueva edición del Festival de la fresa de Candamu foi Jorge Sánchez, productor de Ventosa, que traxo les meyores y asina llevó la Fresa d’Oru. Curiosamente la pasada edición el premiu llevólu so madre. Bon ambiente, altes temperatures y bon tiempu en Grullos pol Festival de la Fresa. Puyáronse a 30 €/2 quilos.
Les lluvies de los últimos díes amenorgaron la collecha de la fresa. Nesto coinciden dellos de los catorce productores que participen na 44 edición del Festival de la fresa de Candamu. Dícennos que tien bon sabor pol calor d’abril, pero que l’agua de los últimos díes estropióla. Polo qu’a dalgunos costó-yos axuntar el quilo qu’hai que traer pa esponer. Daqué que ratifiquen los miembros del xuráu que dictaminen cuála ye la meyor fresa. Dícennos qu’hai poco, pero sabroso, dalgunos de tamañu más que considerable. Asina lo asegura Guillermo García, técnicu del Serida. Sicasí, la collecha d’esti frutu coloráu llega hasta bien entrada la seronda, polo que confíen en que les lluvies dean tregua y poder recoyer muncha fresa.
Bones freses y bona música, la de “La Xordia- Les Regueres” qu’animó la mañana y la posibilidá de pasiar polos puestos d’artesanía y productos asturianos qu’ocupaben parte de la cortil del Festival que como ye habitual celebróse al campu.
Siguiendo l’horariu previstu la entrega de premios a la Fresa d’Oru, Fresa de Plata, Fresa de Bronce y Fresa d’Honor, producióse en redol a les 13:00 hores cola llectura de l’acta del xuráu y una reconocencia a los mayores y a los más nuevos “que son el futuru del festival”. De siguío, celebróse la puya del primer premiu, la Fresa d’Oru, unos 2 quilos de freses que fueron adquiríos por 30,00 euros, siendo’l preciu final el mesmu que de salida pos el públicu nun s’amosó animáu a puxar.
Los premiaos fueron anguaño fueron: Julián Rapp Alonso, la Meyor presentación; Jorge Sánchez Miranda, Fresa d’Oru; Orencita Miranda Álvarez, fresa de Plata, y Luis Fernández, fresa de Bronce. La Fresa d’Honor pola so aportación al Festival y pola so trayectoria recayó en Mª Cruz Arango Gutiérrez.
