- Fonte: RTPA / Los aguilandeiros de San Xuan percuerren Grau pa pidir l’aguilandu
Una mazcarada d’iviernu con personaxes populares que xenera una gran espectación
El médicu, recetando milagroses pastiyes pa fomentar la natalidá. L’afeitón, pasando a navaya cuanta barba foi atopando nel so camín. L’osu, el diablu, el cura, los maragatos, y asina hasta 18 personaxes formaron parte de los Aguilandeiros de San Xuan de Villapañá. Tamién el vieyu, la vieya y la fía de dambos.
Una mazcarada d’iviernu que foi percorriendo casa per casa delles aldegues de Grau, onde nun faltaron les sos trastaes de siempre, la so música y los sos bailles. Too ello metanes una gran espectación y numberosos curiosos que nun quixeron perder detalle.
Y que fueron gasayaos polos vecinos con un bon aguilandu. Una tradición ancestral qu’antaño protagonizaben solo los mozos solteros de los pueblos de Grau. Y qu’anguaño esfruten neños y mayores nuna xornada de fiesta, rises y muncha diversión.
