Alborecemos col cielu poco nuboso o escampláu, sicasí tenemos delles nublines no fonderu los valles con unes temperatures que tan alrodiu de los 3ºC, rexistrándose nel puirtu Payares -0,4ºC.
Güei seguiremos esfrutando del sol anque pela tarde van dir n’aumentu les nubes altes, de sur a norte, pa dexanos el cielu nuble al finar la xornada con unes temperatures másimes en nidiu ascensu, sobre too nel interior, dalgo más conteníu pel llitoral por mor de les brises costeres.
La selmana viniente vamos tener un camudu radical del tiempu al producise una descarga fría sobre l’atlánticu, onde van formase una cadena de borrasques que van dir empobinándonos vientu ábrigu qu’al pasu pela cordelera van provocar l’efeutu foehn, perdiendo humedá y ganando temperatura polo que les temperatures en superficie medrarán bultablemente, sobre too de cara al finar la selmana onde tendremos unes másimes perriba de los 22-24ºC.
El cielu va tar empuercáu de nubosidá media-alta entemecida ente dellos claros, siendo más abondosa la nubosidá na fastera más surocidental d’Asturies y cordelera onde nun se descarten precipitaciones por retención, sobre too na cara sur y na primera metá de selmana. Nel restu sedrán poco probables, sicasí’l martes y sobre too’l miércoles puen desendolcase les nubes y dexanos dellos xarabatos de calter tormentosu irregularmente repartios.
Como contraste a esta subida de les temperatures, esti domingiu 3 de marzu acaba de batise un nuevu récord de temperatura mínima pa esti mes, concretamente na Vega Lliordes nos Picos d’Europa. Gracies a la red d’estaciones que mos ufierta NOROMET podemos monitorizar la estación que tienen na Vega Lliordes onde güei a les 7:37 am algamaronse la friolera de -30,4ºC de temperatura.
