- Fonte: LNE / Videu / César, un llabrador de cabecera y la prueba de la berza.
- Market gardening: El Sembrador / semeyes /
«N’Asturies tenemos tou para ser una superpotencia de la güerta»
César García Diéguez, llabrador ecolóxicu «de cabecera».
César García encarna’l potencial agrícola que tien la vega de Bueño, qu’hasta mediaos del sieglu XX foi la despensa d’Uviéu.
Na finca La Fuelga, esti productor ecolóxicu de proximidá cultiva les hortolices que depués sirve en cestes selmanales a decenes de families n’Uviéu, que son los sos veceros habituales, amás d’abastecer a una tienda y dos restoranes.
«Hai agora una corriente, el market gardening, que ye faer una agricultura totalmente respetuosa colo tradicional tocantes a nun usar químicos nin híbridos nin cueses rares. Tou eso, pero aplicando técniques más actuales. Nun tar cola fesoria de tola vida. Aprovechar meyor los espacios, faer unos cultivos más intensivos, digamos, y nun basalo tou nun monocultivu».
El market gardening ye’l términu inglés que s’usa en munches partes del mundu para referinos a un modelu de güerta orgánica comercial a bien pequena escala. El to güertu ye’l to negociu: la esencia del market gardening. Un market garden tien que ver col conceutu de güerta tradicional, onde se cultiven distintes verdures para la so vienta directa, a una escala que nun se mide n’hectárees sinón en metros cuadraos, y para un públicu local.
