Publicado en NATURA

Inversión de 1,5 mill/€ na Ría de Villaviciosa

Casi 1,5 millones d’euros para recuperar les güelgues/humedales y porreos de la Ría de Villaviciosa. Villaviciosa y la so ría tán incluyíos nos fondos de recuperación que lleguen d’Europa. El Principáu anunció güei un plan de recuperación de güelgues/humedales y porreos na Reserva Natural de la Ría de Villaviciosa, que va cuntar con una inversión tresañal de casi 1,5 millones financiaos con cargu al Plan Nacional de Recuperación, Tresformamientu y Resiliencia.


El plan, enmarcáu ente les actuaciones de restauración d’ecosistemes ya infraestructura verde del fondu de recuperación Next Generation EU, va tener algame nacional pola so magnitú ya interés, yá que va sirvir de referencia pa otros ecosistemes vulnerables a l’afección por cambéu climáticu.

L’actuación presentose güei en Villaviciosa’l conseyeru de Mediu Rural y Cohesión Territorial, Alejandro Calvo, xuntu col alcalde maliayés, Alejandro Vega, y la delegada del Gobiernu n’Asturies, Delia Llosa.

Reactivación del marisquéu

A lo llargo de 2022 va llevase a cabu la ellaboración del estudiu y el diseñu de l’actuación, no que s’inclúi la restauración d’una amplia área del estuariu, ocupada por praderíes y pacionales. La iniciativa va traer una importante recuperación del ecosistema que va favorecer a 17 especies de fauna de la zona y va aumentar la estensión de seis de los hábitats d’interés comuñal qu’ellí esisten. Tamién va tener repercusiones positives nos invertebraos marinos, al traviés de la meyora de superficies para la reactivación de los llabores de marisquéu.

Los trabayos previstos inclúin la recuperación de zones húmedes sobro praderíes salines con altu valor ambiental: los porreos de Sebrayu, El Salín, El Cierrón, El Porréu, El Retiru, La Enciena y Albatros, col fin de reforzar estabilizar consolidar murios y esaniciar elementos ayenos.

Tamién se van recuperar les enllanaes enfollagaes intermareales y va actuase sobro los porreos d’El Cierrón Norte, Retiro Norte, La Marquesa, La Muslera, La Basona y La Encienona de Seloriu. Coles mesmes, ta previstu restaurar arenales con praderíes d’algues p’ameyorar la calidá de les agües y la biodiversidá, na redolada de la punta de la Barra y la marxe esquierda de la ría. Otra de les llínees va dirixida a protexer árees d’altu valor frente a potenciales efectos de l’acción de les persones.

La ría y el turismu

En paralelu potenciaránse los itinerarios ambientales interpretativos de la ría y los sos valores, asitiando elementos informativos y miradores que faciliten la observación de flora y fauna.

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *