- Fonte: Nortes.me /
Nos años de mayor rellumanza de la minería asturiana, a empiezos del sieglu XX, casi’l 20% de los trabayadores de los pozos yeren menores d’edá.
Les fábriques y les mines europees fueron mientres les primeres décades de la revolución industrial daqué según el Selvaxe Oeste#acabante conquistar: nun había normes nin llendes naquella llacuada de producción y arriquecimientu aceleráu. La cara de la tierra y el calter de les sociedaes camudó absoluta y irreversiblemente en cuestión d’años, pero suel omitise’l paisaxe de fondu d’aquel gran tresformamientu. Un panorama dickensiano, de borrines tóxiques, ríos d’agua negro y neños enxencles cubiertos de sarriu. N’Asturies fueron los washers, los llimpiadores de carbón, un términu inglés abigorniáu pol fala popular hasta derivar nel emblemáticu “guah.e”.
La Universidá d’Uviéu quixo homenaxar n’unu de los sos espacios más nobles-la parte alta del claustru del edificiu históricu-a esos neños enxencle y cubiertu de sarriu que trabayaron per miles y mientres décades nes mines de la rexón. Hasta’l próximu 3 de mayu puede visitase la esposición fotográfica “Guah.es mineros”, ellaborada pola Fundación Obra Social del Montepío de la Minería Asturiana y Asociación Plena Inclusión Asturies.
Al actu inaugural de la esposición, celebráu esta selmana, allegaron dalgunos de estos guah.es que fai más o menos seis décades entraron a trabayar nes mines teniendo 14 ó 15 años. Ellos fueron de los postreros, cuidao que el trabayu infantil nes mines españoles foi casi erradicado a partir de la década de los 50, dempués de que les Naciones Xuníes fixeren una declaración al respeutu en 1959. Pero solo casi: en 1961 un accidente na Mina Miravalles, n’Ayer, causó la muerte d’un adolescente de 16 años.
SEMEYA: Fundación Obra Social del Montepío de la Minería Asturiana
Anque les primeres fotografíes de l’amuesa remontense a 1912, yá había menores d’edá trabayando nes mines dende siquier 30 años antes. Los miserables salarios que se pagaben na dómina obligaben a les families a tener a los sos fíos trabayando pa llevar unes monedes a casa. Nun ye casual que’l proletariu, siguiendo l’orixe llatinu de la palabra, sía aquel que la so única riqueza ye la producción de fíos colos que nutrir a la industria o al exércitu.
En 1885, de les 490 mines actives n’Asturies, contabilizaben en total casi 900 neños emplegaos nel interior o nel esterior de los pozos. Quince años dempués, casi’l 20% de los mineros que trabayaben n’Asturies yeren neños, y esi porcentaxe caltúvose casi esactu mientres décades. Nel añu 1920, cuando n’Asturies había 34.000 mineros, daqué más de 6000 yeren menores trabayando en condiciones bien precaries y de gran peligrosidá.
Magar lo abuitao de la cantidá, lo cierto ye qu’Asturies nun yera una de les rexones con mayor índiz de trabayu infantil nes mines. Una investigación ellaborada por Miguel Ángel Pérez de Perceval Verde y Andrés Sánchez Picón, “El trabayu infantil na minería española, 1850-1940”, asitia a Asturies como una comunidá con “un nivel entemediu” nel empléu de mano d’obra infantil. Colos datos citaos nel artículu, qu’analicen les plantiyes llaborales n’esplotaciones mineres de too tipu-carbón, fierro, chombu, cinc…-, asitiar a les provincies de Córdoba, Xaén, Huelva y Vizcaya como les que menos neños empleguen, con porcentaxes d’ente’l 10 y el 14%. Esa cifra nun va superar el 20% n’Asturies, pero sí nes mines de *Almería y Murcia, onde ronda’l 30 ya inclusive el 40% a finales del sieglu XIX nesta última provincia.
SEMEYA: Fundación Obra Social del Montepío de la Minería Asturiana
En 1873 apruébase una primer llei que busca erradicar esta práctica, pero solu nos sos casos más estremos: prohíbese trabayar a los menores de 10 años, y hasta los 13 solo mientres 5 hores. A les neñes solo dexábase-yos entrar na mina ente los 14 y los 17 años, cuando se consideraba que teníen de volver a casa pa dedicase a les xeres doméstiques.
Una nueva llei en 1900 foi un pocu más allá, y prohibió que los menores de 16 años desempeñaren cualquier trabayu soterrañu. Anque la lexislación yera contundente, impunxéronse los intereses de la industria-esquito d’obra barata- y les necesidaes de les families obreres-más salarios p’alimentar a la prole. Lo habitual yera que les families falsificaben les partíes de nacencia de los sos fíos y les empreses faíen como que nun s’enteraben.
La esposición cunta cómo socesives lexislaciones, al pie de la movilización del movimientu obreru, fueron erradicando el trabayu infantil nes mines d’España, pero recuerda que sigui esistiendo en munchos otros países. Según la Organización Internacional del Trabayu (OIT), un organismu de les Naciones Xuníes, nel mundu hai en redol a 1 millón de neños y neñes d’ente 5 y 17 años que trabayen n’actividaes rellacionaes cola minería.
En total, más de 150 millones de menores d’edá vense obligaos a trabayar en tol mundu. La mayoría en países d’Asia y África subsahariana, anque’l mundu desarrolláu tampoco ta llibre del tou. Esta mesma selmana, l’estáu norteamericanu d’Iowa aprobó un proyectu de llei que contempla dexar a los mozos de 14 años trabayar en veces nocherniegues, a los de 15 emplegase en llínees de montaxe y que los de 16 y 17 sirvan alcohol. Nun ye estrañu qu’esto asoceda: la mayor fantasía de les élites económiques ye tornar al Selvaxe Oeste de la desregulación total.
