El 19, 20 y 21 de mayu de 2023 celébrase la fiesta y la feria cola qu’Uviéu rinde homenaxe al llabor de los homes y muyeres del campu. La fiesta, con antecedentes hasta siquier el sieglu XVI, ta declarada d’interés turísticu rexonal.
Mercaos nel centru y nel Campu
Anguaño, la fiesta va empezar el día 19 de mayu, vienres, cuando se va abrir el mercáu na plaza de la Catedral Plaza Porlier y cai Eugenio Abascal para la esposición y vienta de quesos y productos agroalimentarios –sidra, miel, cerveces artesanes, productos frescos de güerta y ecolóxicos o productos ensin gluten o alérxenos. Va Tar abiertu tamién el sábadu 20. Los mesmos díes el programa inclúi nel Paséu del Bombé del Campu San Francisco otru mercáu, este para artesanía, con vienta y talleres. Nel Campu, programáronse tamién les actividaes infantiles.
Conciertos N’El Bombé
Nel Paséu d’El Bombé del Campu, Festexos programó anguaño muncha música: tonada, actuaciones corales…y dos conciertos abiertos al públicu con empiezu a les 21,30. El vienres 19 van actuar “Los Berrones” y el sábadu, Nando Agüeros dientro de la so xires para celebrar los 20 años sobro los escenarios.
Ganáu n’El Asturcón, quesos nel Auditoriu L’II Concursu de Ganáu “Ciudá d’Uviéu”
Feria de L’Ascensión de va celebrar sábadu y domingu nel centru Ecuestre d’El Asturcón que va cuntar con un mercadín, actuaciones de folclore, esposición de maquinaria agrícola y exhibición de deporte tradicional. Quien deseyen allegar van poder utilizar tresporte gratuitu pal treslláu hasta L’Asturcón.
El programa de la conceyalía de Festexos pa esta Feria de L’Ascensión 2023 inclúi la final del III Concursu nacional de quesu d’autor “El talentu del Quesu” que se va celebrar nel Auditoriu Príncipe Felipe’l vienres dende les 4,30 de la tarde.
L’homenaxe
La Feria y Fiestes de L’Ascensión d’Uviéu son un homenaxe de la ciudá al campu, esti homenaxe tien la so máxima espresión nel que se rinde nel actu d’entrega de los premios de “Paisanu y Paisana del Añu” que se va celebrar el día 21 al mediudía nel Auditoriu. Los premios inclúin otres distinciones pa persones que trabayen nel campu asturiano, de la investigación al relevu xeneracional.
El desfile folclóricu
Y el sábadu 20, dende les 5 de la tarde va haber un Desfile Folclóricu pel centru de la ciudá col siguiente percorríu: Uría, San Francisco, Ramón y Cajal, Plaza de Riego, Pesu, Plaza de la Constitución, Jesús, Fruela y Campu San Francisco hasta llegar al Paséu del Bombé.
Un menú con cereces
De xueves a domingu, nuna convocatoria d’OTEA, podrá tastiase en chigres y restoranes d’Uviéu’l Menú de L’Ascensión, dientro del calendariu gastronómicu de la ciudá, cada vez con más adeptos. Esi menú tradicional componse de Menestra de temporada colos meyores productos de la güerta asturiana, carne gobernada cola antigua receta “al estilu d’Uviéu” y tarta de quesu con cereces. Un menú que fai alusión al tradicional refrán d’esta fiesta: “Por L’Ascensión, cereces n’Uviéu y trigu en Llión”.
