Publicado en Mitoloxía

Cuélebre, una de les criatures más conocíes de la mitoloxía asturiana

Pocos conocen la lleenda qu’envuelve a la Sablera de San Llorienzo y que, amás, da-y nome.

El Cuélebre, el llamáu «Dragón Asturianu», ye una de les criatures más conocíes de la mitoloxía asturiana. La mayoría de los testimonios coinciden en que se trata d’un machu de culiebra que sigue creciendo mientres sieglos hasta algamar un tamañu xigantescu y esplegar nales d’esperteyu.

Pero esti ser monstruosu cubiertu d’escames con una durez mayor que la del fierro sentía atracción pol oru y los oxetos brillosos, guardando los sos ayalgues nel interior de ciertes cueves. Asina, la so presencia ye bono de rastrexar n’ensame de llugares n’Asturies y Llión, como La Cabeza’l Cuélebre (Llena), La Vuelta’l Cuélebre (Colunga), Valdecuélabre (Somiedu) o El Pozu’l Cuélebre (Cangues d’Onís). Inclusive Victor Manuel dedicaríalu una de los sos cantares.

Asina, l’etnógrafu y dibuxante Bertu Álvarez Peña recueye nel so llibru Mitos de Xixón la lleenda tresmitida por Manín de Selmo al folcklorista Luis Argüelles na década de 1940. Manín, un xixonés que yá rondaba los noventa y tantos años, cuntó-y esta vieya hestoria sobro’l cuélebre qu’habitaba a la fin de la sablera de San Llorienzo. Conocemos más relatos sobro esta criatura nel conceyu de Xixón, pero la de Manín ye l’únicu que fai referencia al arenal.

Va munchos años, un Cuélebre que vivía nuna cueva del cabu de San Llorienzo, frente a La Isla de la Fontica (llamada modernamente La Isla la Tortúa, pola forma), tenía apavoriaos a los pescadores de Cimavilla. Desesperaos por ver cómo la sierpe destruyía de cutio les sos llanches y apareyos colos que ganaben el sustentu pidieron ayuda a Gorín, un ermitañu que moraba nel Picu’l Sol. Ésti ufiertóse pa dar muerte a la bestia, pero, a cambéu, los playos teníen d’alimentalo lo que-y quedara de vida.

Gorín escoyó a Xuana, xuna moza de quince años, fía de madre soltera, por que lo acompañara hasta la cueva del Cuélebre. Una vegada na entrada Gorín llamó a la bestia y, cuando sintieron que s’averaba, l’ermitañu quitó la faxa que cinxía la cintura de la nueva y refundiara a la cabeza del reptil namás apaecer, quedando amansáu y dondu. Darréu, l’ermitañu enfusó nel cubil de la bisarma onde atopó un lloréu  d’oru, l’ayalga que’l dragón taba curiando. Gorín llanzó’l lloréu al mar y ordenó al Cuélebre que fora tres él, sumiendo pa siempres so les enfarrucaes foles del cantil.

L’ermitañu pasó a vivir entós a la cueva del Cuélebre, mientres los pescadores cumplíen col tratu tou les selmanes llevándo-y alimentu. Sicasí, si dalguna vegada escaecíen faelo, un cuervu posa nel llugar qu’anguaño se conocemos como La Llomba’l Cuervu y colos sos gazníos recordaba a los playos la so obligación.

La Colina’l Cuervu (Fotografía: MACHBEL)

 

Col tiempu, enriba de la cueva del lloréu foi edificada la capiya de San Llorienzo de Mar, bautizando tamién al cabu y al inmensu arenal que lo abarganara: la sablera de San Llorienzo. Lo cierto ye qu’esa capiya esistió, y de fechu Jovellanos trescribiría delles coples y cantares populares que faíen referencia a les ancestrales procesiones marineres ente la capiya de San Llorienzo de Tierra (abargana del Conceyu) y la de San Llorienzo de Mar. Como aquella que diz:

«Vengo de San Llorienzo de la Tierra,
voi pa San Llorienzo de la mar,
enguedeyar, enguedeyar, enguedeyeme,
nunca me pudi desenguedeyar…»

Autor:

Maestra de Llingua Asturiana Colexu Carmen Ruiz-Tilve - Uviéu

Deja una respuesta

Tu dirección de correo electrónico no será publicada. Los campos obligatorios están marcados con *